دوو کەس لە سنووری پێنجوێن بە درۆن کرانە ئامانج و یەکیان گیانی لەدەستدا
ئەمجارە لە جیاتی کێڵگەی نەوتی، هاووڵاتییان بە درۆن کرانە ئامانج و زیانی گیانی لێکەوتەوە
دوو کەس لە سنووری پێنجوێن بە درۆن کرانە ئامانج
هێرشە درۆنییەکان بۆ سەر هەرێمی کوردستان بەردەوامە و ئەمجارە دوو کەس کرانە ئامانج و زیانی گیانی لێکەوتەوە.
ئەمڕۆ شەممە، دوو کەس لە کاتی لێخووڕینی ماتۆڕ لە گوندی شیوەگوێزان لە سنووری ناحیەی گەرمک لە قەزای پێنجوێنی سنووری پارێزگای سلێمانی، بە درۆنێک هێرشیان کرایە سەر و لە ئەنجامدا یەکێکیان گیانی لەدەستدا و ئەوەی دیکە بە سەختی بریندار بوو.
بەگوێرەی زانیارییە سەرەتاییەکان، تا ئێستا ڕوون نییە کە قوربانییەکان سڤیلن یان نا، بەڵام جلوبەرگی سڤیلیان لەبەردا بووە و تا ئێستاش کەس بەرپرسیارەتی ئەم هێرشانەی هەڵنەگرتووە و نازاندرێت کێ ئەنجامی داون.
جێی باسە لە چەند ڕۆژی ڕابردووەوە، بە بەردەوامی هێرشی درۆنی دەکرێتە هەرێمی کوردستان و کێڵگە نەوتییەکان (کە تێیدا کۆمپانیای ئەمریکی و ئەوروپی کار دەکەن) دەکرێنە ئامانج.
