باران و هەورەبرووسکە هەرێمی کوردستان دەگرێتەوە

كه‌شناسی هۆشداری به‌ هاووڵاتییان ده‌دات، له‌وه‌ی كه‌ ناوچەکە دەکەوێتە ژێر کاریگەریی بارستە هەوایەکی ناسەقامگیر، کە دەبێتە هۆی دروستبوونی گەواڵەبارانی بەهاری و هەورەبرووسکە لە ناوچە جیاجیاکاندا.

ئه‌مڕۆ بەشی پێشبینی لە بەڕێوەبەرایەتی گشتی کەشناسی و بوومەلەرزەزانی هەرێمی کوردستان، ڕاپۆرتی شیکاریی خۆی سەبارەت بە گۆڕانکارییەکانی کەشوهەوا بۆ ڕۆژانی 24 و 25ی نیسانی 2026 بڵاوکردەوە.

بەڕێوەبەرایەتییەکە ئاماژەی بەوە کردووە کە بۆ ڕۆژی هەینی، ئاسمانی ناوچەکە بە گشتی لە نێوان پەڵەهەور و نیمچەهەوردا دەبێت، بەڵام لە کاتەکانی نیوەڕۆ تاوەکو ئێوارە، ئەگەری گۆڕانی ئاسمان بۆ هەوری تەواو و دابارینی نمەباران و بارانی مامناوەند لە ئارادایە. ئەم شەپۆلە بە شێوەیەکی سەرەکی ئیدارەکانی ڕاپەڕین و سۆران، ناوچە شاخاوییەکانی هەولێر و دهۆک، هەروەها سەنتەری شارەکانی هەولێر، کەرکووک و باشووری پارێزگای سلێمانی دەگرێتەوە.

سەبارەت بە ڕۆژی شەممە، کەشناسی جەختی لەوە کردووەتەوە کە کاریگەریی ئەم ناسەقامگیرییە لە ناوچە شاخاوییەکانی هەولێر، دهۆک و ئیدارەی سۆران بەردەوامی دەبێت، بە جۆرێک پێشبینی دەکرێت دابارین بە شێوەی نمەباران و گەواڵەبارانی بەهاری لەو شوێنانەدا چڕ ببێتەوە.

له‌ ڕاگه‌یه‌ندراوه‌كه‌ هاتووە، سیستەمی با لە ماوەی 48 کاتژمێری داهاتوودا بە شێوەیەکی گۆڕاو دەبێت؛ بۆ ڕۆژی هەینی خێرایی با لە نێوان 10 - 20 کم/ک دەبێت و لە هەندێک کاتدا چالاک دەبێت بۆ سەروو 30 کم/ک. بەڵام بۆ ڕۆژی شەممە، خێرایی با ڕوو لە هێوربوونەوە دەکات و بۆ 05 - 15 کم/ک دادەبەزێت. هاوکات، مەودای بینین لە نێوان 8 بۆ 10 کیلۆمەتردا جێگیر دەبێت، ئەمەش ئاستێکی ئاساییە بۆ هاتووچۆی گشتی.

له‌ ڕاگەیەندراوەکە ڕوون كراوه‌ته‌وه‌، کە پلەکانی گەرما لە ڕۆژی هەینیدا جێگیر دەبن و نزیک دەبن لە تۆمارکراوەکانی ڕۆژی پێشوو، بەڵام بۆ ڕۆژی شەممە پێشبینی بەرزبوونەوەیەکی کەم بە بڕی 1 بۆ 2 پلەی سیلیزی دەکرێت.

بەپێی پێشبینییەکانی بەڕێوەبەرایەتییەکە، بەرزترین پلەی گەرما لە سەنتەری پارێزگاکان و ئیدارە سەربەخۆکان بەم شێوەیە دەبێت:

هەولێر: (23 بۆ 24) پلە

سلێمانی: (22 بۆ 23) پلە

دهۆک: (25) پلە (بە جێگیری)

گەرمیان: (28 بۆ 29) پلە

هەڵەبجە: (26 بۆ 27) پلە

سۆران: (19 بۆ 20) پلە

حاجی ئۆمەران: (14 بۆ 13) پلە (کە ساردترین ناوچەی هەرێم دەبێت).

لە کۆتایی ڕاگەیەندراوەکەدا، کەشناسی داوا لە هاووڵاتییان دەکات لە کاتی چالاکبوونی هەورەبرووسکە و هەورە تریشقەدا، ڕێکارە پارێزگارییەکان ڕەچاو بکەن، بەتایبەت لە ناوچە شاخاوییەکان و ئەو شوێنانەی ئەگەری گەواڵەبارانی تووندیان لێ دەکرێت.