مەسرور بارزانی: هیوادارم ئاگربەستی نێوان ئەمریکا و ئێران بەردەوام بێت
مەسرور بارزانى لە پەیامێکدا سوپاسی هەموو ئەو لایەنانەی کرد، کە هاوکار بوون لە پاراستنی هەرێمی کوردستان.
سەرۆکوەزیران مەسرور بارزانی پەیامێکی لەسەر کۆتایی هێنان بە جەنگی ئێران و زیانەکانی جەنگەکە لەسەر کوردستان بڵاوکردەوە و تێیدا پێشوازی لە ئاگربەستی ئەمریکا و ئێران کرد.
ئەمڕۆ چوارشەممە، مەسرور بارزانی، سەرۆکی حکومەتی هەرێمی کوردستان لە پەیامێکدا لەبارەی ئاگربەستی ئێران و ئەمریکا نووسی: "ئومێدەوارم ئاگربەستی نێوان ئەمریکا و ئێران بەردەوام بێت و ڕێخۆشکەر بێت بۆ سەقامگیری و ئاشتییەکی بەردەوام لە ناوچەکەدا."
مەسرور بارزانی سوپاسی هەموو ئەو لایەنانەی کرد کە هاوکاربوون لە پاراستنی هەرێمی کوردستان. لەسەر هێرشەکانی سەر هەرێمی کوردستان لە کاتی جەنگی ئێران جەختی کردەوە، کە هێرشەکان " ناڕەوا و بێ پاساو بوون." هیوای خواست هێرشەکان بۆ سەر خەڵکی سڤیل، پێشمەرگە، ژێرخان و نوێنەرایەتییە دیپلۆماسییەکان کۆتاییان پێ بێت.
سەرۆکی حکومەتی هەرێمی کوردستان لە کۆتایی پەیامەکەیدا ئامادەیی هەرێمی کوردستانی بۆ کەمکردنەوەی گرژی و گەیشتن بە ئاشتیی هەمیشەیی لە ناوچەکە دەربڕی.
