دژە تیرۆری کوردستان: بەدرۆن هێرش کرایە سەر کێڵگەی نەوتی هاند ئۆیلی ئەمریکی

بەدرۆن هێرش کرایە سەر کێڵگەی نەوتی هەنت ئۆیلی ئەمریکی

دژە تیرۆری کوردستان هێرشێکی دیکەی درۆنی بۆ سەر کێڵگەیەکی نەوتیی ئەمریکی لە سنووری پارێزگای دهۆک ڕاگەیاند و بەمەش دەبێتە سێ هێرشی درۆنی تەنیا لە بەربەیانی ئەمڕۆدا.

ئەمڕۆ چوارشەممە، دژە تیرۆری کوردستان ڕایگەیاند، لە کاتژمێر 7:14، لە ڕێگەی درۆنێکی بۆمبڕێژکراوەوە هێرش کرایە سەر کێڵگەی نەوتی "هاند ئۆیلی ئەمریکی" لە باعەدرێ لە قەزای شێخانی سەر بە پارێزگای دهۆک، هاوکات هیچ زیانێکی گیانی و ماددی لێ نەکەوتەوە.

لە لایەکی دیکەوە، هەر ئەمڕۆ لە کاتژمێرەکانی نێوان 6:00 و 7:00ـی بەیانی لە ڕێگەی دوو درۆنی بۆمبڕێژکراوەوە هێرش کرایە سەر کێڵگەی نەوتی DNO لە پێشخابوور و تاوکێ لە سنووری ئیدارەی سەربەخۆی زاخۆ.

جێی باسە دوو ڕۆژ لەمەوبەر، لە ڕێگەی دوو درۆنی بۆمبڕێژکراو هێرشکرایە سەر کێڵگەی نەوتی خۆرمەڵە لە پارێزگای هەولێر و بەرەبەیانی دوێنێش کاتژمێر 7:00ـی بەیانی، هێرشکرایە سەر کێڵگەی نەوتیی سەرسەنگ لە سنووری پارێزگای دهۆک، دواتر نیوەڕۆی هەمان ڕۆژ درۆنێک لە ناحیەی تەکیە کەوتە خوارەوە و بەر شاخێک کەوت.