هەر دەزگایەک زانیاری نهێنی بڵاوبکاتەوە کە زیان لە ئاسایشی و سەقامگیریی هەرێمی كوردستان بدات ڕووبەڕووی لێپیچینەوە دەبێت

دەزگای ئەنجومەنی ئاسایشی هەرێمی کوردستان، لە ڕاگەیاندراوێک دا هۆشداری دەداتە تەواوی دەزگاکانی ڕاگەیاند لە بڵاوکردنەوەی هەر بابەتێکی هەستیار و پەیوەست بە هێرشەکانی سەر هەرێمی کوردستان و دەڵێت کە ڕووبەڕووی ڕێکاری یاسایی دەبنەوە.


دەقی ڕاگەیاندراوەکە: 

ڕاگەیەندراوێك لە ئەنجومەنی ئاسایشی هەرێمی كوردستانەوە

بەهۆی ئەو بارودۆخە ئەمنی و هەستیارەی هەرێمی كوردستان و عێراق و ناوچەكە پێیدا تێپەڕ دەبێت، ئەركی هەموو دەزگەكانی ڕاگەیاندن و لایەنە پەیوەندیدارەكان و سەرجەم هاووڵاتییانە كە بەوپەڕی بەرپرسیارێتیەوە مامەڵە لەگەڵ ئەو دۆخە بكەن و خۆیان لە هەرجۆرە ڕەفتارێك یان بڵاوكردنەوەی زانیاری و نهێنییەك بپارێزن كە خزمەتی نەیارانی كوردستان دەكات و زیان بە ئاسایش و سەقامگیریی هەرێم دەگەیەنێت.

هەر بۆ ئەو مەبەستە فەرمان بە دژەتیرۆری كوردستان كراوە كە هەر دەزگەیەكی ڕاگەیاندن بە بڵاوكردنەوەی زانیاری و نهێنییەكان و پۆششدانی ناپرۆفیشناڵانەی هەواڵەكانی شەڕ و پەلامارەكانی دوژمن، زیان لە ئاسایشی و سەقامگیریی هەرێمی كوردستان بدات، دەستبەجێ ئەو دەزگەیە لەلایەن دژەتیرۆری كوردستانەوە ڕووبەڕووی لێپیچینەوە دەبێت و بەپێی یاسا ڕێکاری پێویستیان بەرامبەر دەگیرێتە بەر، هەروەها هەر بەرپرسێكیش بەهۆی لێدوانەكانی ببێتە هۆی ئاشكرابوونی زانیاریی هەستیار و لێدوانەكانی خزمەتی دوژمن بكات و زیان لە ئاسایشی هەرێم بدات، بەپێی یاسا  لێپێچینەوەی لەگەڵدا دەکرێت.

ئەنجومەنی ئاسایشی هەرێمی کوردستان
 13ی ئاداری 2026