عێراق لە بڕیاری بە تیرۆریست ناساندنی حوسییەکان و حیزبوڵا پاشگەز بووەوە
حکومەتی عێراق دوای خستنی حووسییەکان و حزبوڵای لوبنانی بۆ نێو لسیتی تیرۆر ڕایگەیاند، بەهەڵە ئەم کارەیان ئەنجام داوە
عێراق لە بڕیاری بە تیرۆریست ناساندنی حیزبوڵای لوبنان و حووسییەکانی یەمەن پاشگەز بووەوە و ڕایگەیاندووە، لیستەی بڵاوکراوی پەیوەندیدار پێداچوونەوەی بۆ نەکرابوو و بە هەڵە بڵاوکراوەتەوە.
ئەمڕۆ پێنجشەممە، لیژنەی بلۆك كردنی سەروەت و سامانی تیرۆریستان لە بانكی ناوەندیی عێراق لە ڕوونکردنەوەیەکدا بۆ ڕای گشتی بڵاویکردەوە، پەیوەست بە بڕیاری لیژنەی بلۆك كردنی سەروەت و سامانی تیرۆریستان ژمارە 61ـی ساڵی 2025 كە لە ڕۆژنامەی واقائعی عێراقی بە ژمارە 4848 لە 17/11/2025دا بڵاوكرایەوە و بلۆككرنی سەروەت و سامانی لیستێك لە قەوارە و كەسایەتی پەیوەست بە ڕێكخراوی داعش و قاعیدەی تیرۆرست لەخۆدەگرێت لەسەر بنەمای داوای دەوڵەتی مالیزیا و پشتبەست بە بڕیاری ئەنجوومەنی ئاسایشی نێودەوڵەتیی ژمارە 1373ی ساڵی 2001، لیستەكە ئاماژەی بە ژمارەیەك حیزب و قەوارە كردبوو، كە هیچ پەیوەندییەكیان بە چالاكی تیرۆریستییەوە نییە لەگەڵ ئەو دوو ڕێكخراوی كە باسكراون.
هەر لە ڕوونکردنەوەکەدا ئاماژە بەوەشکراوە، ڕەزامەندی عێراقیش تەنیا لەسەر پۆلێنكردنی قەوارە و كەسانی سەربە داعش و قاعیدە كورت بووەتەوە و دانانی ناوی قەوارەكانی تر بەهۆی ئەوە بووە لیستەكە بەر لە پێداچوونەوە بڵاوبووەتەوە، ئەوەی لە ڕۆژنامەی وەقائعی عێراقیدا بڵاوبووەتەوە ڕاستدەكرێتەوە و ناوی ئەو قەوارەو حیزبانە لە لیستی قەوارەكانی پەیوەست لە ڕێكخراوە تیرۆرستییەكانی داعش و قاعیدە دەردەهێنرێت.
