کۆتا ئەنجامی سەرژمێریی عێراق ڕاگەیەندرا 

وەزیری پلاندانانی عێراق ئەنجامی کۆتایی سەرژمێریی دانیشتوانی عێراقی ئاشکرا کرد.

ئەمڕۆ چوارشەممە، وەزارەتی پلاندانانی عێراق ئەنجامی کۆتایی سەرژمێری دانیشتوانی ڕاگەیاند و جەختی لەوە کردەوە، بەردەوام دەبێت لە ژماردنی ئەو عێراقییانەی کە لە دەرەوەی وڵات دەژین.

محەممەد تەمیم، وەزیری پلاندانانی عێراق لە کۆنگرەیەکی ڕۆژنامەوانیدا ئەنجامی کۆتایی سەرژمێری ڕاگەیاند و وتی، سەرژمێری ساڵی 2024 یەکەم سەرژمێرییە لە ماوەی 37 ساڵدا و دوا سەرژمێریی تەقلیدییە.

محەممەد تەمیم لە کۆنگرە ڕۆژنامەوانییەکەدا ڕایگەیاند، ژمارەی دانیشتووانی عێراق گەیشتووەتە 46 ملیۆن و 118 هەزار و 793 کەس و 8 ملیۆن خێزان، ئاماژەی بەوەشکرد، تێکڕای قەبارەی خێزان لە عێراق 5.7 تاکە.

تەمیم جەختیشی کردەوە، کۆکردنەوەی داتاکانمان لەسەر ئاستی پارێزگاکان تەواوکردووە و ڕادەستی پارێزگارەکان دەکەین بۆ ئەوەی بەو پێیە پلان دابڕێژن، کۆمەڵگەی عێراق کۆمەڵگەیەکی گەنج و ئومێدبەخشە، عێراقیش چووەتە ناو پاداشتی دیمۆگرافییەوە.

دووپاتیشی کردەوە، سەرژمێری دانیشتووان سەرژمێرییەکی گەشەپێدانە و مەبەست لێی چارەسەرکردنی کێشە سیاسییەکان نییە؛ ئامانجی دابینکردنی خزمەتگوزارییە.