ئێران: ئاماده‌ین بۆ دووه‌مین جه‌نگ له‌گه‌ڵ ئیسرائیل

یه‌كێك له‌ ئه‌ندامانی په‌رله‌مانی ئێران ئاماده‌یی وڵاته‌كه‌ی خۆی بۆ گه‌ری دووه‌می جه‌نگ له‌گه‌ڵ ئیسرائیل نیشان ده‌دات و باس له‌وه‌ ده‌كات، له‌ كۆی وڵاتانی ناوچه‌كه‌ ئاماده‌ین بۆ ڕووبه‌رووبوونه‌وه‌ و جه‌نگی فراوان له‌گه‌ڵ ئیسرائیل.

ئه‌مڕۆ یه‌كشه‌ممه‌ ڕوحوڵڵا نەجابەت، ئه‌ندامی لیژنه‌ی ئاسایشی نه‌ته‌وه‌یی په‌رله‌مانی ئێران ڕایگه‌یاند، له‌ ئێران، عێراق، یه‌مه‌ن و لوبنان میحوه‌ره‌كانی خۆڕاگری پێكهاته‌ و ئاستی خۆیان به‌شێوه‌یه‌كی بێ وێنه‌ به‌رز كردووه‌ته‌وه‌ و ئاماده‌ین بۆ هه‌ر ده‌ستدرێژییه‌كی ئیسرائیل له‌ ناوچه‌كه‌ و به‌ سه‌ختی ڕووبه‌رووی ده‌بینه‌وه‌.

ئه‌و ئه‌ندامه‌ی لیژنه‌ی ئاسایش جه‌ختی له‌وه‌ كرده‌وه‌، ئیسرائیل هه‌ر هه‌ڵه‌یه‌ك بكات كۆتایی پێدێت و له‌گه‌ری دووه‌می جه‌نگ بو قورسی باجه‌كه‌ ده‌دات و یه‌ك هه‌ڵه‌ ده‌بێته‌ كۆتا هه‌ڵه‌ی.

ئه‌مه‌ له‌كاتێكدایه‌، له‌ ڕۆژی 13ی حوزه‌یرانی 2025 ئیسرائیل هێرشێكی چڕی مووشه‌كی و درۆنی كرده‌ سه‌ر تارانی پایته‌خت و چه‌ند شوێنێكی دیكه‌ی ئێران و دواتر ئێران به‌ هێرشێكی فراوانتر وه‌ڵامی دایه‌وه‌ و بۆ ماوه‌ی 12 ڕۆژ جه‌نگ له‌نێوان ئه‌و دوو وڵاته‌ زلهێزه‌ به‌رده‌وام بوو و له‌ كۆتایی حوزه‌یراندا به‌ نێوه‌ندگیری دۆناڵد تره‌مپ ئاگربه‌ست ڕاگه‌یه‌ندرا.