بانگه‌شه‌ زیانی به‌ 300 هه‌زار دره‌خت گه‌یاندووه‌

له‌گه‌ڵ ده‌ستپێكردنی بانگه‌شه‌ی هه‌ڵبژاردن ژینگه‌پارێزان هۆشداری پیسبوونی ژینگه‌ و دیمه‌نی شه‌قامه‌كان دا و له‌ئێستاشدا و دوای كۆتایی هاتنی پرۆسه‌كه‌ باس له‌وه‌ ده‌كرێت، زیاتر له‌ 300 هه‌زار دره‌خت زیانی به‌ركه‌وتووه‌.

ئه‌مڕۆ شه‌ممه‌ ڕوانگه‌ی عێراقی سه‌وز بڵاویكرده‌وه‌، به‌ربژێره‌كانی خولی شه‌شه‌می په‌رله‌مانی عێراق لق و پۆپی دره‌خته‌كانیان شكاندووه‌ و بزمارییان بۆ هه‌ڵواسینی پۆسته‌ره‌كانیان به‌كارهێناوه‌ و ئه‌مه‌ش وایكردووه‌ زیاتر له‌ 300 دره‌خت زیانی به‌ربكه‌وێت و دیمه‌نی شه‌قام و شوێنه‌ گشتییه‌كانیش به‌ته‌واوی شێواوه‌ و ناشرین بووه‌.

له‌ بڵاوكراوه‌كه‌ی ڕوانگه‌ی عێراقی سه‌وز هاتووه‌، به‌ربژێره‌كان ڕێنماییه‌كانی كۆمسیۆنیان شكاندووه‌ و سه‌رپێچیان كردووه‌، هه‌ر به‌ دره‌خت و شه‌قه‌مه‌كان نه‌وه‌ستاون به‌ڵكو پۆسته‌ره‌كانیان له‌سه‌ر ستوونه‌كانی كاره‌باش هه‌ڵواسیوه‌ و ناتواندرێت وه‌ك لێ بكرێته‌وه‌ و ئه‌مه‌ش پێشهاتێكی نوێ و مه‌ترسیداری پرۆسه‌ی بانگه‌شه‌ی هه‌ڵبژاردنه‌.

له‌ كۆتایی بڵاوكراوه‌كه‌ی ئه‌و ڕوانگه‌یه‌ به‌ربژێره‌كانی وه‌ك كه‌سانی ناشارستانی و ناسه‌رده‌می باس كردووه‌ و پێیوایه‌ پێویست بوو باشتر ره‌فتار بكه‌ن و هه‌ڵسوكه‌وتیان جوانتر بێت و داواشی كردووه‌، به‌توندی سزایان بده‌ن.

ئه‌مه‌ له‌كاتێكدایه‌، كاتژمێر 7ی به‌یانی ئه‌مڕۆ پرۆسه‌ی بانگه‌شه‌ی هه‌ڵبژاردنی خولی شه‌شه‌می په‌رله‌مانی عێراق كۆتایی هات و سبه‌ی ده‌نگدانی تایبه‌ت به‌رێوه‌ده‌چێت و 48 كاتژمێر دواتریش پرۆسه‌ی ده‌نگدانی گشتی به‌رێوه‌ده‌چێت.