له‌ هه‌ولێر دووباره‌ ئاوی قوڕس به‌كارده‌هێندرێته‌وه‌

له‌ هه‌ولێر پڕۆژه‌ی ڕیسایكلینی ئاوی قوڕس نزیكه‌ له‌وه‌ی قۆناغی یه‌كه‌می ته‌واو بێت و چاوه‌روان ده‌كرێت سوودی بۆ پڕۆژه‌ی پشتێنه‌ی سه‌وزاییش هه‌بێت.

ئه‌مڕۆ هه‌ینی ئاری ئەحمەد، بەڕێوەبەری گشتی ئاو و ئاوەڕۆی هەرێمی کوردستان ڕایگه‌یاند، له‌ داهاتووییه‌كی نزیك قۆناغی یه‌كه‌می پڕۆژه‌ی ڕیسایكلی ئاوی قورسی هه‌ولێر ته‌واو بێت و دواتر ده‌توانین ئاوی ئاوه‌ڕۆكانی هه‌ولێر بپاڵێوین و بۆ ده‌یان بابه‌تی دیكه‌ی كشتوكاڵی و گه‌شتوگوزار سوودی لێ ببینین.

ناوبراو سه‌باره‌ت له‌ ته‌واوبوونی پڕۆژه‌كه‌ ئاشكرای كرد، له‌ ناوەڕاستی مانگی تشرینی دووەم قۆناغی یه‌كه‌می پڕۆژه‌ی ڕیسایكلینی ئاوی قوڕسی هه‌ولێر ته‌واو ده‌بێت و دواتر ڕاسته‌وخۆ ده‌ست به‌ قۆناغی دووه‌می پڕۆژه‌كه‌ ده‌كرێت.

به‌گوێره‌ی زانیارییه‌كان، پڕۆژه‌ی ریسایكلینی ئاوی قوڕسی هه‌ولێر كۆتایی به‌  ئاوەڕۆی 120مەتری ده‌هێنێت و ده‌تواندرێت سوودی لێ ببیندرێت بۆ ئاودێری شوێنه‌ كشتوكاڵییه‌كان و ته‌نانه‌ت پشتێنه‌ی سه‌وزاییش.