لێژنەی کشتوکاڵ و ئاوی پەرلەمانی عێراق سوودانی بە کەمتەرخەم ناودەبات

لەبارەی چارەسەرنەکردنی قەیرانی ئاو لە عێراق، کۆمەڵێک ڕەخنە ڕووبەڕووی محەممەد شیاع سوودانی سەرۆکوەزیرانی عێراق بووەتەوە.

قەیرانی ئاو لە عێراق تەنگی بە خەڵک و حکومەت هەڵچنیوە و زۆربەی خەڵک و لایەن و دامودەزگا پەیوەندیدارەکان ئاماژە بەوە دەکەن، کە حکومەتی عێراق و لە سەرووی هەمووانەوە، محەممەد شیاع سوودانی سەرۆکوەزیرانی عێراق بۆ چارەسەرکردنی ئەو قەیرانە کەمتەرخەمە و بایەخێکی ئەوتۆی پێنادات.

لەمبارەیەوە سائیر موخیف ئەندام لە لێژنەی کشتوکاڵ و ئاوی پەرلەمانی عێراق بە تووندترین شێوە ڕەخنەی لە سوودانی گرتووە و ڕایگەیاندووە، بەغدا سەرجەم بەڵێنەکانی خۆی بۆ تورکیا بردووەتە سەر، بەڵام لە بەرامبەردا ئەنقەرە پشکی ئاوی عێراقی زیاد نەکردووە، ئەمەش دەگەڕێتەوە سەر کەمتەرخەمی و پابەندنەبوونی محەممەد شیاع سوودانی سەرۆکوەزیرانی عێراق و لایەنە پەیوەندیدارەکان.

ئەو ئەندامەی لێژنەی کشتوکاڵ و ئاو لە پەرلەمانی عێراق ئاماژە بەوەدەکات، تا ئێستا هیچ ڕێککەوتنێک نەماوە کە لەگەڵ تورکیا نەکرێت، بەڵام وڵاتەکە خەریکە لە بێ ئاوی و قەیرانی ئاودا دەخنکێت، کەچی حکومەت هیچ خەمێک بۆ ئەم گرفتە ناخوات و سەرۆکوەزیرانەکەشی بێدەنگتر و کەمتەرخەمتر لە هەمووانە، ئەنقەرە سەرەڕای جێبەجێکردنی هەموو بەڵێنەکان لەلایەن عێراقە، تاوەکو ئێستا ڕێککەوتنەکەی خۆی جێبەجێ نەکردووە.