هەر کەسێک زەیتە ساختەکەی کڕیوە پارەکەی بۆ دەگەڕێندرێتەوە

بەڕێوەبەرایەتی چاودێری بازرگانی هەولێر دەستیان بەسەر کارگەیەکی نایاسایی بەرهەمهێنانی زەیتی زەیتوونی ساختە گرت، هۆگر عەلی دەڵێت: "هەر کەسێک زەیتە ساختەکەی کڕیوە پارەکەی بۆ دەگەڕێندریتەوە".

ئەمڕۆ سێشەممە هۆگر عەلی، بەڕێوەبەری چاودێری بازرگانی هەولێر بە پایتەخت میدیای ڕاگەیاند، بەهۆی دەستبەسەرداگرتنی کارگەیەکی نایاسایی کە زەیتی زەیتوونی ساختەی بەرهەم دەهێنا، 3 کەس دەستگیرکراون و دەستیان بەسەر بڕێکی زۆر زەیتی ساختەدا گرتووە.

هۆگر عەلی جەختی لەوەکردەوە، داوا لە هاووڵاتییان دەکات لە هەر شوێنێک زەیتی زەیتوونە ساختەکەیان کڕیوە بە پسووڵەوە بیگەڕێننەوە بۆ ماڕکێتەکە و پارەی خۆیان وەربگرنەوە.

بەڕێوەبەری چاودێری بازرگانی هەولێر ڕوونیکردەوە، هەر کەسێک پارەکەی وەرنەگرتووە با تەلەفۆنیان بۆ بکەن و ئاگادارییان بکەنەوە.

بەرهەمەکە بە ناوی "زەیتی زەیتوونی ئەبو حسێن"، کە زەیتی چێشتی ئاساییان لەگەڵ ڕەنگ و بۆنی تایبەت تێکەڵ کردووە و دواتر وەک زەیتی زەیتوونی سروشتیان فرۆشتووەتەوە.