مامۆستایەک قوتابییەکی تەمەن 14 ساڵانی ئەشکەنجە داوە

مامۆستایەک قوتابییەکی تەمەن 14 ساڵانی ئەشکەنجە داوە و بەهۆی قورسی و زۆریی ئازارەکەیەوە قوتابییەکە گیانی لەدەستداوە. 

بەپێی هەواڵی ناوەندی دیدبانی ئێران، قوتابییەکی تەمەن 14 ساڵان بە ناوی نیما نەجەفی، خەڵکی شاری مازەندەران بەهۆی ئەوەی مامۆستاکەی لێی داوە و ئەشکەنجەی کردووە، تووشی جەڵتەی دڵ بووە و گیانی لەدەستداوە. 

زانیارییەکان باس لەوە دەکەن، کە پۆلیس و بنەماڵەی قوتابییەکە کامێرای چاودێریی قوتابخانەکەیان سەیر کردووە و بۆیان دەرکەوتووە، کە مامۆستاکە ئەو قوتابییەی ناچار کردووە دوو جار بە دەوری حەوشەی قوتابخانەکەدا هەڵبێت و دواتر لێی داوە و ئازاری پێ گەیاندووە، هەر بەمەشەوە نەوەستاوە و ئەشکەنجەی داوە. 

بنەماڵەی نیما نەجەفی ڕایانگەیاندووە، کوڕەکەمان کێشی زۆر بوو، مامۆستاکەی بەبێ هیچ مافێک لە منداڵەکەمان داوە و ئەشکەنجەی کردووە، دادپزیشکیش لەوبارەوە ڕایگەیاندووە، بەهۆی قورسیی ئەشکەنجەکەوە قوتابییەکە تووشی جەڵتەی دڵ بووە و مردووە.