وادەی دەستپێکردنەوەی هەناردەی نەوت ڕادەگەیەندرێت

ڕێککەوتنی سێ قۆڵی لەسەر دەستپێکردنەوەی نەوتی هەرێمی کوردستان نزیکە و کۆمپانیای سۆمۆش وادەی دەستپێکردنەوەکە ئاشکرا دەکات.

ئەمڕۆ سێشەممە کۆمپانیای سۆمۆ لە راگەیەندراوێکدا رایگەیاند، واژووکردنی رێککەوتنی کۆتایی نەوت نزیکە و پرۆسەکە گەیشتووەتە قۆناغی کۆتایی، کۆمپانیا نەوتییەکان دڵنیاکراونەتەوە کە شایستە داراییەکانیان وەک خۆی وەردەگرن.

لەبارەی وادەی دەستپێکردنەوەی نەوتی هەرێمی کوردستان کۆمپانیای سۆمۆ جەخت لەوەدەکاتەوە، دەبێت حکومەتی عێراق بەم نزیکانە کاتی دەستپێکردنەوەی هەناردەی نەوت رادەگەیەنێت.

عەلی نزار، بەڕێوەبەری كۆمپانیای سۆمۆ ڕایگەیاند، ڕێككەوتنەكە گەیشتووەتە قۆناغەكانی كۆتایی، بەوپێیەی گەیشتووینەتە میكانیزمی پتەو بۆ جێبەجێكردنی ئەم رێككەوتنەوەو پەمپكردنی بڕی بەرهەمی هەرێم، دوای تەواوبوونی چاوەڕێی رێكارەكانی پەمپكردن دەكەین و هەندێك لە كارەكان بە نوسراو دیكۆمێنت دەكرێن.