کەمترین رێژەی خانەنشینان دیاریکرا

وەزارەتی کار وکاروباری کۆمەڵایەتی کەمترین رێژەی خانەنشینانی ئەو کرێکار وکارمەندانەی لە کەرتی تایبەت کار دەکەن دیاریکرد.

ئەمڕۆ چوارشەممە وەزارەتی کار و کاروباری کۆمەڵایەتی حکومەتی هەرێمی کوردستان بڵاویکردەوە، بە پشت بەستن بە یاسای ژمارە 4ـی ساڵی 2012ـی پەرلەمانی کوردستان، بڕیاریدا ئەو کرێکار و کارمەندانەی لە کەرتی تایبەت و دامەزراوەکان کاردەکەن کەمترین مووچەی خانەنشینیان نابێت لە ڕادەی هەرە کەمی مووچەی خانەنشینی فەرمانبەری حکومی بێتە خوارێ.

باسی لەوەشکرد، لە یاسای خانەنشینی یەکگرتووی ژمارە 9ـی ساڵی 2014 هاتووە و بریتییە لە بری 500000 دینار بە پێی ئەو مەرجانەی لە یاسای خانەنشینی و دەستەبەری کۆمەڵایەتی بۆ کرێکاران هاتوە ژمارە 39ـی ساڵی 1971. 

وەزارەتەکە جەختی لەوەشکردەوە، مووچەی خانەنشینی بێشەکی نابێت کەمتربێت لە ئاستی کۆمەکی پاراستنی کۆمەڵایەتی.