تۆمەتباری ڕووداوی کوشتنی کاسبکارەکەی خورماڵ دەستگیرکرا

توانرا لە ماوەی کەمتر لە کاتژمێرێکدا، تاوانباری کوشتنی ئەو هاووڵاتییە دەستگیربکرێت کە لە نێو دووکانەکەی خۆی تەقەی لێکرا بوو و کوژرا بوو.

ئەمڕۆ یەکشەممە، بەڕێوەبەرایەتی گشتی ئاسایش - سلێمانی ڕایگەیاند، دوای بڵاوبوونەوەی هەواڵی کوشتنی کاسبکارێک لە خورماڵ، بەڕێوەبەرایەتی ئاسایشی شارەزوور، دەستبەجێ لەسەر ئەم ڕووداوە لێکۆڵینەوە و بەدواداچوونی ئەنجامدا، دوای کۆکردنەوەی زانیاری ورد، لەماوەی کەمتر لەکاتژمێرێکدا توانرا تۆمەتبار دەستنیشان بکرێت و بەفەرمانی دادوەری لێکۆڵینەوەی ئاسایش دەستگیربکرێت و لەکاتی لێکۆڵینەوە تۆمەتبار دانی بەتاوانەکەیدا ناوە.

ئەو کەسەی کوژراوە، ناوی (وەهبی تاهیر مەیکە)ـیە، تەمەنی 43 ساڵە، باوکی 3 منداڵە و ماوەی نزیکەی 7 ساڵە لە قەزای خورماڵی پارێزگای هەڵەبجە دووکانی خواردەمەنی هەبووە.