سانسۆر لەسەر ماڵپەڕە نەشیاوەکان دادەندرێت
داوا دەکرێت لە هەرێمی کوردستانیش ماڵپەڕە نەشیاوەکان سانسۆر بکرێن
پێمان باشە لە هەرێمی کوردستانیش سانسۆر لەسەر ماڵپەڕە نەشیاوەکان دابندرێت
دوای ئەوەی وەزیری پەیوەندییەکانی عێراق بڕیاری لە بلۆککردنی ماڵپەڕە نەشیاوەکان، داوا دەکرێت لە هەرێمی کوردستانیش ماڵپەڕەکان سانسۆر بکرێن.
ئەمڕۆ شەممە د.عەبدوڵڵا شێرکاوەیی، گوتەبێژی یەکێتی زانایانی ئاینی ئیسلام بە پایتەخت میدیای ڕاگەیاند، پێمان باشە هاوشێوەی عێراق لە هەرێمی کوردستانیش ماڵپەڕە نەشیاوەکان بلۆکبکرێن.
جەختی لەوەشکردەوە، ئەمە هەنگاوێک دەبێت بۆ بەرژەوەندی گشتی و ڕێکخستنی تۆڕە کۆمەڵایەتییەکان کە کاریگەرییەکی ڕاستەوخۆی لەسەر گەنجان و خێزان و لایەنی کۆمەڵایەتی دەبێت.
لەبارەی ئاڕاستەکردنی نووسراوی فەرمی لەسەر ئەم بابەتە ئەوەشی خستەڕوو، پیشووتر لە دوو ساڵی رابردوودا بە نووسراوی فەرمی داوامان لە وەزارەتی گواستنەوە و گەیاندن کردووە، کە هەوڵبدەن لە ڕێگەی بەرنامەیەکی تایبەت ماڵپەڕە نەشیاوەکان سانسۆر بکرێت.
د.عەبدوڵڵا شێرکاوەیی باسی لەوەشکرد، ئەمە بەبەردەوامی داوای یەکێتی زانایان بووە، چونکە هەندێ ماڵپەڕ هەیە زیان بە کۆمەڵگەو شیرازەی خێزان دەگەیەنن، بۆیە گرنگە فلتەرێک هەبێت.
ئەمڕۆ د. هیام یاسری، وەزیری پەیوەندییەکانی عێراق ئاشکرای کرد، بۆ ڕازی کردنی خودا بڕیاری بلۆککردنی ماڵپەڕە نەشیاوەکانمان دا.
