ئەمریکا ڕەتیکردەوە ڤیزا بە سەرۆکی فەڵەستین بدات
ئەمریکا ڕێگە نادات سەرۆک و بەرپرسانی فەلەستین بەشداری لە کۆبوونەوەکانی کۆمەڵەی گشتی نه‌ته‌وه یه‌کگرتووه‌کان بکەن
بەهۆی ڕەتکردنەوەی پێدانی ڤیزا پێیان، سه‌رۆک و 80 به‌رپرسی فه‌ڵه‌ستینی ناتوانن به‌شداریی کۆبوونه‌وه‌کانی کۆمەڵەی گشتی نه‌ته‌وه یه‌کگرتووه‌کان.
ئەمڕۆ شەممە، وەزارەتی دەرەوەی ئەمریکا ڕایگەیاند، واشنتۆن ڕێگه به مه‌حموود عه‌باس، سه‌رۆکی دەسەڵاتداریی فه‌ڵه‌ستین نادات به‌شداری له کۆبوونەوەکانی کۆمەڵەی گشتی نه‌ته‌وه یه‌کگرتووه‌کان بکات که بڕیاره له مانگی 9ـی داهاتوو لە ویلایەتی نیویۆرک به‌ڕێوه‌بچێت.
لەمبارەیەوە ماڕکۆ ڕوبیۆ، وەزیری دەرەوەی ئەمریکا سەرزەنشتی سەرۆکی فەلەستینی کرد بەهۆی بەم کەم زانینی هەوڵەکانی ئاشتی و هه‌وڵه‌کانی بۆ مسۆگه‌رکردنی دانی پێدانانی یه‌کلایه‌نه به ده‌وڵه‌تی فه‌ڵه‌ستین.
هاوکات ڕوبیۆ داواشی لە ده‌سه‌ڵاتداریی فه‌ڵه‌ستینی کرد، "هه‌وڵه‌کانی بۆ تێپه‌ڕاندنی گفتوگۆکان له ڕێگه‌ی هه‌ڵمه‌ته‌کانی شه‌ڕی یاسایی نێوده‌وڵه‌تییه‌وه ڕابگرێت، له‌وانه سکاڵا تۆمارکردن له دادگای تاوانکاری نێوده‌وڵه‌تی و دادگای دادی نێوده‌وڵه‌تی، چونکە ئه‌م دوو هه‌نگاوه وای کردووه بزوتنەوەی حه‌ماس ڕه‌تی بکاته‌وه بارمته‌کانی ئازاد بکات، هه‌روه‌ها بووه‌ته هۆی هه‌ڵوه‌شانه‌وه‌ی گفتوگۆکانی ئاگربه‌ست له غه‌ززه."
له به‌رامبه‌ردا، سه‌رۆکایه‌تیی فه‌ڵه‌ستین نیگەرانی و سه‌رسوڕمانی خۆی له بڕیاره‌که‌ی وه‌زاره‌تی ده‌ره‌وه‌ی ئه‌مریکا ده‌ربڕی و ڕایگەیاند، ئه‌م بڕیاره له‌گه‌ڵ یاسای نێوده‌وڵه‌تی و "ڕێککه‌وتننامه‌ی باره‌گای نه‌ته‌وه یه‌کگرتووه‌کان"دا ناگونجێت، به‌تایبه‌تی که ده‌وڵه‌تی فه‌ڵه‌ستین ئه‌ندامێکی چاودێره له نه‌ته‌وه یه‌کگرتووه‌کان، بۆیە داوای لە ئەمریکا دەکات دەستبەجێ بە بڕیارەکەیاندا بچنەوە.
ئەمە لە کاتێکدایە، فەڕەنسا بڕیاری داوە لە کۆبوونەوەکانی کۆمەڵەی گشتی نه‌ته‌وه یه‌کگرتووه‌کان دان بە دەوڵەتی فەڵەستیندا بنێت، کە ئەمریکا و ئیسرائیل بە هەموو شێوەیەک دژی ئەم بڕیارەن.
