ئاماری قوربانیانی شەڕەکەی سلێمانی بڵاوکرایەوە
شەڕەکەی گەڕەکی لالەزاری سلێمانی 3 کوژرا و 15 برینداری لێ کەوتەوە
دوای ئەوەی شەڕێکی 4 کاتژمێریی لە نێوان هێزە چەکدارەکانی لاهور شێخ جەنگی و ئاسایشی سلێمانی ڕوویدا، ژمارەیەک کوژرا و برینداری لێ کەوتەوە.
ئەمڕۆ هەینی، سەرچاوەیەکی ئەمنی سلێمانی ڕایگەیاند، بەهۆی شەڕ و ئاژاوەکانی دوێنێ شەوی نێوان هێزەکانی ئاسایشی سلێمانی و چەکدارانی سەر بە لاهور شەێخ جەنگی، سەرۆکی بەرەی گەل، 3 کەس گیانیان لەدەستدا و 15 دیکەش بریندار بوون.
هەر بە گوێرەی ئەم سەرچاوەیە، ئەو کەسانەی کوژراون بریتین لە: سەرمەند عەلی، كارمەندی هێزەكانی بەڕێوەبەرایەتی ئۆپراسیۆنی ئاسایشی سلێمانی، دیار سەردار حەکیم، ئەندامی کۆماندۆی کوردستان و ئاری شێخ سوعاد شێخ جەبار تاڵەبانی، ئەندامی کۆماندۆ.
ئەمە لە کاتێکدایە، بەرەبەیانی ئەمڕۆ زوو شەڕ و پێکدادان لە نێوان هێزه ئه‌منییه‌كانی سلێمانی و چه‌كدارانی سه‌ر به لاهور شێخ جه‌نگی، سه‌رۆكی به‌ره‌ی گه‌ل، ڕوویدا و بەهۆیەوە سێ كه‌س گیانیان له‌ده‌ستداوه و نزیكه‌ی 15 كه‌سیش برینداربوون، هاوکات لاهور شێخ جه‌نگی و دوو برای خۆی، لەگەڵ 200 کەسی دیکە دەستگیرکران.
