سەتان پێشمەرگە زەوی وەردەگرن
بڕیاری وەرگرتنی زەوی بۆ سەتان پێشمەرگە دەرچوو
لە چوارچێوەی پڕۆسەی دابەشکردنی زەوی بەسەر فەرمانبەراند، لە قەزای ئاکرێ ژمارەیەکی دیکەی پێشمەرگە و فەرمانبەر ڕەزامەندی وەرگرتنی زەوییان بۆ دەردەچێت.
ئەمڕۆ چوارشەممە بڵند ڕەزا، سەرۆکی شارەوانی قەزای ئاکرێ ڕایگەیاند، لە ئێستادا 1630 فەرمانبەر بۆ وەرگرتنی پارچە زەوی ناویان گەڕاوەتەوە و داوا لە پێشمەرگە و مامۆستایان دەکرێت سەردانی بەڕێوەبەرایەتییەکە بکەن بۆ پشتڕاستکردنەوەی ناوەکانیان.
سەرۆکی شارەوانی ئاکرێ ئەوەشی خستەڕوو، لیستێکمان لەبەردەستە کە ناوی زیاتر لە 7 هەزار فەرمانبەر و پێشمەرگەی تێدایە کە مافی وەرگرتنی زەوییان هەیە و ڕەزامەندییان بۆ دەرچووە، هاوکات دابەشکردنی زەوی لە سنوری قەزای ئاکرێ بە سێ قۆناغ ئەنجام دەدرێت، لە قۆناغی یەکەم هەزار و 36 فەرمانبەر و لە قۆناغی دووەم چوار هەزار و 548 و قۆناغی سێیەمیش هەزار و 630 فەرمانبەرە.
ناوبراو گووتیشی، " 2500 پارچە زەوی لە سنوری قەزای ئاکرێ ئامادەکراوە بۆ دابەشکردن بەسەر فەرمانبەرانی ئەو قەزایە، ئێستا کار لەسەر تەرخانکردنی زەوی و تەواوکردنی ڕێکارەکانی کووژانەوەی ئەو زەوییانە دەکەین کە بۆ دابەشکردن بەسەر فەرمانبەران دیاریکراون".
