بۆچی ئەوانەی شەکرەیان هەیە لاواز دەبن

پسپۆرێکی نەخۆشیەكانی هەناو و شەکرە دەڵێت، دابەزینی کێش لە نەخۆشانی شەکرەدا دەگەرێتەوە بۆ چەند هۆکارێک لەوانەش زۆرجار بەهۆی چەند نەخۆشییەک ڕوودەدات لە کاتی درووستبوونی نەخۆشی شەکرە وەک نەخۆشیەکانی غودەی چالاک و نەخۆشیەکانی هەوکردن یان نەخۆشی گەنم و نەخۆشی رۆماتیزمە.

هۆکارەکانی دابەزینی کێش لە تووشبوویەکی شەکرە ئەمانەن:

یەكەم- نەبوونی ئەنسۆلینی پێویست یاخود نا چالاکی ئەم هۆڕمۆنە، بە هۆی ئەمەش ئەندامەکانی جەستە ناتوانن شەکرەی ناو خوێن بەکاربهێنن و جەستە دەستدەکات بە تێکشکاندن و بەکارهێنانی چەوری.

دووەم- دابەزینی کێش لە نەخۆشانی شەکرەی جۆری 2 دەگەرێتەوە بۆ بەکارهێنانی چەند حەبێکی شەکرە وەک مێتفۆرمین یان چەند جۆرێکی تری حەبی شەکرە.

سێیەم- ئەگەر کەم خوێنی و دابەزینی کێشی زۆر  بەتایبەتی لە کەسانی جگەرەکێش پێویستە پشکنینی زیاتری بۆ بکرێ بۆ دڵنیا بوون لە نەخۆشی شێرپەنجە.

چوارەم- ئەو کەسانەی شەکرەکەیان بەرزە و بڕیار ئەدەن پارێزیەکی زۆر قورس و سەخت بکەن ئیتر هیچ شتێک نەخۆن لەپێناوی ئەوەی شەکرەکەیان کۆنتڕۆڵ بێت، لەوانەیە کێشی جەستەیان زۆر بە خراپی دابەزێت.