کونسوڵی گشتیی بەریتانیا ماڵئاوایی لە کوردستان دەکات
کونسوڵی گشتیی بەریتانیا بە فەرمی ئەرکەکانی لە هەرێمی کوردستان کۆتایی پێ هێنا.
کونسوڵی گشتیی بەریتانیا بەهۆی کۆتاییهاتنی کار و ئەرکەکانی لە هەرێمی کوردستان، بە مەبەستی سوپاسکردن و ماڵئاوایی سەردانی سەرۆک بارزانی دەکات.
ئەمڕۆ بارەگای بارزانی ڕایگەیاند، ئەندرو بیزلی، کونسوڵی گشتیی بەریتانیا بە بۆنەی کۆتاییهاتنی ئەرکەکەی و بۆ ماڵاواییکردن، لە هەولێر سەردانی سەرۆک مەسعود بارزانی کرد، لە دیدارەکەدا کونسوڵی گشتیی بەریتانیا سوپاس و پێزانینی خۆی بۆ سەرۆک بارزانی دەربڕی.
کونسوڵی گشتیی بەریتانیا ڕوونی کردەوە، خەڵکی هەرێمی کوردستان هەمیشە پاڵپشتی بوون لە ئەرک و کارەکەیدا، هەروەها جەختی لە گرنگیی بەردەوامی و پێشخستنی پێوەندییەکانی نێوان بەریتانیا و هەرێمی کوردستان کردەوە و هیوای سەقامگیری، ئارامی و ئاسایشی بەردەوامی بۆ هەرێمی کوردستان خواست.
هاوکات سەرۆک بارزانی سوپاسی کونسوڵی گشتیی بەریتانیای لە هەولێر کرد بۆ ئەرکەکانی لە ماوەی ڕابردوودا لە هەرێمی کوردستان و هیوای سەرکەوتنی بۆ خواست لە ئەرکی نوێیدا، هەروەها سەرۆک بارزانی جەختی لەو پێوەندییە مێژووییانە کردەوە کە لە نێوان گەلی کوردستان و بەریتانیادا هەبووە و سوپاس و پێزانینی بۆ گەل و حکوومەتی بەریتانیا هەبوو لەمەڕ هەڵوێستە مێژووییەکانیان بەرامبەر گەلی کوردستان.
