25 کەس بوونە قوربانیی ڕووداوی هاتووچۆ
بەهۆی ڕووداوی هاتووچۆ لە بەغدا، زیقار، بابیل، دیالە و موسەننا 4 کەس گیانیان لەدەست دا و 21 کەس بریندار بوون. هۆکارەکە خێراییی زۆرە.
لە چەند کاتژمێری ڕابردوودا، بەهۆی زنجیرەیەک ڕووداوی هاتووچۆی جیاواز لە پێنج پارێزگای عێراق، 4 کەس گیانیان لەدەست دا و 21 کەسی تریش بریندار بوون، کە باری تەندروستیی بەشێکیان ناجێگیرە.
ئەمڕۆ ماڵپهڕی 'بغداد اليوم' له زاری سەرچاوە پزیشکییەکانهوه ڕایگهیاند، ژمارهیهك ڕووداوی هاتووچۆ لە پارێزگاکانی بەغدا، زیقار، بابیل، دیالە و موسەننا ڕوویان داوە. لە ئەنجامدا 4 هاووڵاتی گیانیان لەدەست داوە کە سێیان زیارەتکار بوون، هەروەها 21 کەسی تریش بریندار بوون کە ژن، منداڵ، قوتابی و کارمەندی پۆلیسیان تێدایە و ڕەوانەی نەخۆشخانە کراون.
بەپێی سهرچاوه پزیشكییهكان، باری تەندروستیی 7 لە بریندارەکان ناجێگیرە. هۆکاری سەرەکیی ڕووداوەکانیش بۆ خێراییی زۆر و تێپەڕاندنی هەڵە لە لایەن شۆفێرانەوە دەگەڕێتەوە.
ئەم ڕووداوانە لە کاتێکدایە کە بەهۆی نەبوونی چاودێریی پێویست، خراپی ڕێگه و بانهكان و پابەند نەبوونی شۆفێران بە ڕێنماییەکان، ئاستی ڕووداوەکانی هاتووچۆ لە عێراق ڕووی لە زیادبوون کردووە.
