تاران دەرگای گفتوگۆی داخست؟
نهێنی کشانەوەی لەناکاوی ئێران لە کۆبوونەوە چوارقۆڵییەکە ئاشکرا بوو.
ئێران بە فەرمی کشانەوەی خۆی لە دانوستانە چوارقۆڵییەکان ڕاگەیاند و هۆکارەکەی بۆ لێدوانە هەڕەشەئامێزەکانی ئەمریکا گەڕاندەوە.
ئهمڕۆ ئیسماعیل بەقایی، وتەبێژی وەزارەتی دەرەوەی ئێران ڕایگهیاند، کە شاندی وڵاتەکەی دوای 18 کاتژمێر لە گفتوگۆ و ڕاوێژ لە سویسرا، بڕیاری گەڕانەوەیان بۆ تاران داوە.
سەرەڕای کشانەوەکە، ئێران ڕایگەیاندووە کە پێشکەوتنی باش لە دۆسیەی فرۆشتنی نەوت و ئازادکردنی پارە بلۆککراوەکان بەدەستهاتووە و میکانیزمێکی تایبەتیش بۆ چاودێریکردنی ئاگربەست لە لوبنان داڕێژراوە.
لە لایەکی دیکەوە، بەرپرسانی تاران هۆشداری توند دەدەنە وڵاتانی دراوسێ و ڕایدەگەیەنن هەر وڵاتێک خاکی خۆی بۆ هێرشکردنە سەر ئێران بەکاربهێنێت، دەبێتە ئامانجی ڕەوای هێزە چەکدارەکانیان.
بڕیارە لە سبەیەوە کارەکانی لێژنە تەکنیکییەکان لەبارەی دۆسیە جیاوازەکان دەستپێبکات.
