فڕۆکەیەک بە 50 سەرنشینەوە لە ڕووسیا تێکشکا و کەوتە خوارەوە

فڕۆکەیەکی نەفەر هەڵگری ڕووسیا بە 50 سەرنشینەوە کەوتەخوارەوە و پێشبینی دەکرێت سەرجەم سەرنشینەکان گیانیان لەدەسدا بێت.

ئەمڕۆ پێنج شەممە، بەرپرسانی فریاکەوتنی رووسیا رایانگەیاند، فڕۆکەیەکی نەفەرهەڵگری جۆری ئانتۆنۆڤ AN-24، کە فڕۆکەی هێڵی ئاسمانیی ئانگارا بووە و 50 سەرنشینی هەڵگرتبوو، لە گەشتێکدا بووە لە شاری بلاگۆڤێشێنسکەوە بۆ شاری تیندا، بەڵام پێش گەیشتنی بە تیندا، کە شارۆچکەیەکی دوورەدەستە لە هەرێمی ئامور لەسەر سنووری چین، لە رادارەکان ون بووە و دواتر لە رۆژهەڵاتی ئەو وڵاتە کەوتووەتە خوارەوە.

بەگوێرەی زانیارییە سەرەتاییەکان، فڕۆکە تێکشکاوەکە لەلایەن هێلیکۆپتەرێکەوە لە ناوچەیەکی دارستانی چڕدا بینراوە و تیمەکانی فریاکەوتن بەرەو شوێنی رووداوەکە بەڕێکەوتوون، گومان دەکرێت سەرجەم سەرنشینەکانیش گیانیان لەدەستدابێت.

بە گوێرەی ڤاسیلی ئۆرلۆڤ، پارێزگاری هەرێمەکە، لە نێو قوربانییەکان پێنجیان منداڵ بوون و شەشیان کارمەندی فڕۆکەکە لەنێو فڕۆکەکەدا بوون.