لە ڕووداوەکەی دەشتی کۆیە سێ کەس گیانیان لەدەستداوە

ئێوارەی ئەمڕۆ ڕووداوێکی هاتووچۆ لە نێوان دوو بارهەڵگر و تراکتۆرێک لە دەشتی کۆیە ڕوویدا، بەم هۆیەوە سێ کەس گیانیان لەدەستداوە و دوو کەسی دیکەش برینداربوون.

کەمێک پێش ئێستا هاوکار عەلی، گوتەبێژی تەندروستیی کۆیە بە پایتەخت میدیای ڕایگەیاند، لە ڕووداوەکەدا شۆفێری هەردوو بارهەڵگرەکە بە تەواوی سووتاون و دەستبەجێ گیانیان لەدەستداوە.

گوتەبێژی تەندروستیی کۆیە ئاماژەی بەوە کرد، تراکتۆرەکە 3 کەسی تێدا بووە کە باوکێک و 2 کچی بوون، لە ئەنجامی ڕووداوەکە و کەوتنەوەی ئاگرەکە، کچێکی تەمەن 10 ساڵان سووتاوە و گیانی لەدەستداوە. 

هاوکار عەلی جەختی کردەوە، 2 بریندارەکەی دیکە کە باوک و کچەکەن و نەسووتاون، لە ئێستادا بە مەبەستی چارەسەرکردن گەیەندراونەتە نەخۆشخانە.