کەشناسی هۆشداری دەدات

كه‌شناسی پێشبینی هاتنی شه‌پۆلێكی به‌هێزی باران و خۆڵبارین له‌ سێیه‌م ڕۆژی جه‌ژن ده‌كات، هه‌روه‌ها جه‌حت له‌ دابه‌زینی پله‌كانی گه‌رما به‌شێوه‌یه‌كی چاوه‌ڕواننه‌كراو ده‌كات.

ئه‌مرۆ بەڕێوەبەرایەتیی گشتیی کەشناسی و بوومەلەرزەزانی هەرێمی کوردستان ڕایگەیاند، کە شەپۆلێکی خۆڵبارین ڕوو لە ناوچەکە دەکات. بەپێی پێشبینییەکان، کاریگەری ئەم شەپۆلە لە بەیانی ڕۆژی هەینییەوە لە ناوچەکانی باشوور و ڕۆژئاوای هەرێم دەست پێدەکات و تا دوای نیوەڕۆ زۆربەی ناوچەکانی دیکە دەگرێتەوە، کە کاریگەرییەکەی تا ڕۆژی شەممە بەردەوام دەبێت.

كه‌شناسی باس له‌وه‌ ده‌كات، ئەمڕۆ پێنجشەممە، ئاسمان نیمچەهەور دەبێت و پلەکانی گەرما بەراورد بە دوێنێ 2 بۆ 3 پلە بەرز دەبنەوە، بەڵام ڕۆژی هەینی پلەکانی گەرما بە ڕێژەی 4 بۆ 6 پلە دادەبەزن و ئەگەری تاوەباران و هەورەبروسکەش هەیە.

هاوکات دەستەی کەشناسیی عێراق هۆشداری دەدات، کە گۆڕانکارییەکانی کەشوهەوا لە ڕۆژانی جەژندا دەبنە هۆی کەمبوونەوەی مەودای بینین و دروستبوونی ئاستەنگ بۆ هاتووچۆی هاووڵاتییان و گەشتیاران، لە کاتێکدا پێشبینی دەکرێت ڕۆژانی شەممە و یەکشەممە ئاسمان بەرەو ساماڵبوون بچێتەوە.

پلەکانی گەرما بۆ ئەمڕۆ پێنجشەممە و سبەی هەینی بەم شێوەیە دەبن:

هەولێر: 36 دابەزین بۆ 31

پیرمام: 32 دابەزین بۆ 26

حاجی ئۆمەران: 23 دابەزین بۆ 21

سلێمانی: 34 دابەزین بۆ 29

چەمچەماڵ: 36 دابەزین بۆ 30

دهۆک: 35 دابەزین بۆ 30

زاخۆ: 37 دابەزین بۆ 32

هەڵەبجە: 37 دابەزین بۆ 31

گەرمیان: 41 دابەزین بۆ 35