کامێراکانی هاتووچۆ سەرپێچی فڕیدانی زبڵ و خاشاک تۆمار دەکەن

پێشووتر کامێراکانی هاتووچۆ تەنیا سەرپێچی تیژڕۆییان تۆمار دەکرد، بەڵام بەپێی بڕیارێکی نوێ لەمەودوا کامێراکان سەرپێچیی فڕێدانی زبڵ و خاشاکە بۆ سەر شەقامەکان تۆمار دەکەن.

ئەمڕۆ دووشەممە بەڕێوەبەرایەتی هاتووچۆی هەولێر بڵاویکردەوە، وەک بەشێک لە ڕێکارەکانی پاک ڕاگرتنی ژینگە، لە ڕێکەوتی 26ـی ئایاری 2026، لە کاتژمێر 6:00ـی ئێوارە بەدواوە، فڕێدانی هەر جۆرە زبڵ و خاشاکێک، وەک دەبە، قوتوو و شووشەی خواردنەوەکان لە ناو ئۆتۆمبێلەکانەوە بۆ سەر شەقامەکان قەدەغەیە.

هاتووچۆی هەولێر ئاماژەی بەوە دا، کامێراکانی چاودێریی تیژڕۆیی بۆ ئەم مەبەستە بەکاردێن و ڕاستەوخۆ سزای دارایی بۆ سەرپێچیکاران تۆمار دەکەن.

ئامانجی سەرەکی لەم ڕێکارە کەمکردنەوەی تێچووی پاککردنەوەی شەقامەکان و بەرزکردنەوەی ئاستی هۆشیاریی ژینگەیی شۆفێرانە.