بەنزینی خراپیان بە خەڵک فرۆشت و بە 80 ملیۆن دینار سزادران

لە ماوەی نزیکەی دوو مانگ دا ژمارەیەک بەنزینخانە لە هەولێر بەهۆی سەرپێچیکردن لە ڕێنماییەکان و فرۆشتنی بەنزینی بێ کوالێتی داخراون.

ئەمڕۆ دووشەممە سالار محەممەد، لێپرسراوی بەشی پشکنین و بەدواداچوونی بەڕێوەبەرایەتیی نەوت و کانزاکانی هەولێر بە پایتەخت میدیای ڕاگەیاند، لە مانگی چوار 12 بەنزینخانەمان بەهۆی کوالێتی خراپی بەنزین داخستووە، هەروەها بە بڕی 42 ملیۆن و 500 هەزار دینار سزادراون.

سالار محەممەد ئاماژەی بەوە دا، لە مانگی پێنج دا تاوەکو ئێستا 7 بەنزینخانەمان داخستوون، لەبەر ئەوەی جاری سیێەم وچوارەمیان بوو سزاکەیان زیاتر بووە کە 37 ملیۆن 500 هەزار دینار سزادراون.

لێپرسراوی بەشی پشکنین و بەدواداچوون دووپاتی کردەوە، بەپێ کوالێتی خراپی بەنزین و دووبارەکردنەوەکەیان ماوەی داخستنەکە دیاری دەکرێت لە 10 ڕۆژ دەستپێدەکات تا 250 ڕۆژ.

سالار محەممەد ئەوەشی خستەڕوو، هەر بەنزینخانەیەک کە دادەخرێت پێویستە سەردانی بەڕێوەبەرایەتی بکات، تاوەکو پارەکەیان لێ وەربگیرێت، هەروەها  تاوەکو و ئەو ماوەی بۆیان دیاری کراوە کوالێتی بەنزینەکە نەگۆڕن بەنزینخانەکانیان ناکرێتەوە.