عەزیز ڕەئووف: ئەوەی بەرامبەر حەمەڕەش کرا، خستنی کۆی شار بوو لە مەردایەتی
"حەجاج لە سلێمانییە"؛ وتارێک کە دەنگدانەوەی زۆری دروست کردووە
ژینگەی زیندان و "حەجاجە" نوێیەکە عەزیز ڕەئووف، نووسەر و چاودێر، لە نوێترین وتاریدا بە ناونیشانی "حەجاج وا لە سلێمانییە"، وێنەیەکی تاریک لە بارودۆخی ناو زیندانەکان و مامەڵەی هێزە ئەمنییەکان دەخاتە ڕوو. ئەو دەڵێت: "لە باشووری عێراق بەدوای حەجاجدا مەگەڕێن، حەجاج لێرەیە و زۆر نزیکە"، ئاماژە بەوە دەکات کە ئێستا جەللادەکان بە قامچی و دڵڕەقییەوە لەناو شار و لەناو زیندانەکاندان و ڕەنگە "خزم و ئامۆزای خۆت بن."
لە پێشمەرگایەتییەوە بۆ جەللادی نووسەر بەراوردکارییەک لە نێوان ڕابردوو و ئێستای حزبەکاندا دەکات و دەڵێت، سەردەمێک شێرکۆ بێکەس سوێندی بە سەری پێشمەرگە ئازاکانی وەک "حەمەڕەشەکەی گەرمیان" دەخوارد کە دژی جەللادەکان دەجەنگان، بەڵام ئێستا هەمان ئەو حزبە بووەتە جەللاد و گەنجێکی دوای ڕاپەڕین کە ئەویش ناوی حەمەڕەشە، لە زینداندا "فەلاقە" دەکەن و سوکایەتی بە شکۆ و پیاوەتیی دەکەن.
"کارگەی بێدەنگکردنی مرۆڤی کورد" لە بەشێکی تری وتارەکەیدا، عەزیز ڕەئووف باس لە مەترسییەکی گەورەتر دەکات و دەڵێت، ئەوەی ڕوو دەدات تەنها تاوانێک نییە بەرامبەر کەسێک، بەڵکو کارخانەیەکە بۆ "سەرکزکردن و لە پیاوەتیخستنی مرۆڤی کورد" بە دەستی دەسەڵات و حزبی کوردی. ئەو جەخت دەکاتەوە کە ئەم کردەیە هەوڵێکە بۆ گۆڕینی ناسنامەی سلێمانی لە "شاری هەڵمەت و قوربانی" و "شاری ڕۆشنبیری"یەوە بۆ شارێک کە تێیدا بێدەنگی و ڕازیبوون بە زوڵم باڵادەست بێت.
ڕەخنە لە ئۆپۆزسیۆن و ڕۆشنبیران نووسەر لە کۆتایی وتارەکەیدا بێدەنگیی کۆمەڵگە و لایەنەکان بە بەشێک لە "کەوتنی مەردایەتی" ناودەبات. ئەو دەڵێت: "ئەوە کۆی حزبە ئۆپۆزسیۆنە ساختەکان بوون لە ئازایەتی خران." هەروەها ئاماژە بەوە دەکات کە لەم پرۆسەیەدا قەڵەم لە ڕۆشنبیر سەندراوەتەوە و ئاینییش لە مەلایەکان دابڕاوە، تاوەکو هەمووان لە ئاست ئەم جۆرە تاوانانەدا تەنها تەماشاکەر بن.
