ئەپیکۆر لەبارەی هەناردەی نەوتی کوردستان ڕوونکردنەوەیەکی بڵاو کردەوە
کۆمەڵەی پیشەسازی نەوتی کوردستان: ڕێککەوتنێکی پابەندکراو هەبێت دەست بە هەناردەکردنی نەوت دەکەینەوە
ئەپیکۆر پشتیوانیی لە پرۆسەی هەناردەکردنەوەی نەوتی کوردستان دەکات و دەڵێت: "ئەگەر ڕێککەوتنێکی نووسراو و پابەندکراو هەبێت ئامادەین دەست بە هەناردەکردنەوەی نەوت بکەینەوە".
کۆمەڵەی پیشەسازیی نەوتی کوردستان (ئەپیکۆر) لە بڵاوکراوەیەکدا سەبارەت بە دەستپێکردنەوەی هەناردەی نەوتی کوردستان ڕایدەگەیەنێت: "خۆشحاڵین بەوەی گفتوگۆکانی نێوان هەولێر و بەغدا چڕکراونەتەوە بۆ گەیشتن بە ڕێککەوتنێک لەبارەی هەناردەکردنەوەی نەوت لەڕێگەی بۆری نەوتی هەرێمی کوردستان لە داهاتووێکی نزیکدا".
جەختی لەوەشکردەوە: "پشتیوانیی هەناردەکردنەوەی نەوتی کوردستان دەکەین و ئامادەین دەست بەجێ دەست بە هەناردەکردنەوەی نەوت بکەینەوە".
سەبارەت بە ڕێککەوتنی نێوان هەرێم و بەغدا گووتی: "ئەگەر ڕێککەوتنێکی نووسراو و پابەندکراو هەبێت کە تێیدا دڵنیایی بدرێت لە شێوازی پارەدان و ڕێزگرتن لە گرێبەستە بەرکار و یاساییەکان، هاوکات چارەسەری ئەو پارەیەش بکرێت کە هێشتا نەدراوەتە کۆمپانیاکان ".
لە درێژەی ڕاگەیەندراوەکەدا ئەوەش هاتووە: "پێویستە شێوازی پارەدانەکە شەفاف بێت و پەسەند بێت لەلای کۆمپانیا نێودەوڵەتییەکان و حکوومەتی هەرێمی کوردستان، دواتر لە ڕێگەی کاش، یاخود لەڕێگەی گواستنەوەی پشکی شایستە وەک خۆی، بدرێت".
