ئەمریکا بەدواداچوون بۆ دۆسیە داراییەکانی عێراق دەکات
نوێنەری ئەمریکا بۆ کاروباری عێراق لەگەڵ وەزارەتی گەنجینەی ئەمریکا و نووسینگەی کۆنترۆڵکردنی سەرمایە بیانییەکان کۆبوویەوە.
مارک ساڤایا، نوێنەری ئەمریکا بۆ کاروباری عێراق ڕایگەیاند، لەگەڵ وەزارەتی گەنجینەی ئەمریکا و نووسینگەی کۆنترۆڵکردنی سەرمایە بیانییەکان (OFAC) کۆبوومەتەوە و تاوتوێی ئاستەنگەکان و دەرفەتەکانی چاکسازی لە سیستەمی بانکی عێراق لە هەردوو کەرتی دەوڵەتی و تایبەتدا کرا و ئەمەش بە ئامانجی، بەهێزکردنی حوکمڕانی دارایی، پابەندبوون بە سیستمە جیهانییەکان و لێپرسینەوەی دامەزراوەیی.
نوێنەری ئەمریکا لە عێراق لە دۆسیە داراییەکانی عێراق گوتوویەتی: "ڕێککەوتووین لەسەر ئەنجامدانی پێداچوونەوەیەکی گشتگیر و ورد بۆ هەموو ئەو تۆمار و مامەڵە داراییە گومانلێکراوانەی کە دامەزراوە، کۆمپانیا و کەسایەتییە عێراقییەکان تێیدا بەشدارن، جیالەمەش پێداچوونەوە بە دۆسیەی ئەو کەسانە دەکرێت کە پەیوەندییان بە کاری قاچاغ، تیرۆر، سپیکردنەوەی پارە، ماماڵە و پڕۆژەی دارایی ساختەکان هەیە."
مارک ساڤایا، لەسەر ئەم دۆسیانە دڵنایی داوە کە ئەمریکا لە هەنگاوەکانی داهاتووی دا، سزای تووندی ئەو کەسانە دەدات و سەبارەت بە پەیوەندییەکانی ئێستای عێراق و ئەمریکا گوتوویەتی: "هەرگیز پێشووتر پەیوەندی نێوان ئەم دوو وڵاتە هێندەی ئێستا بەهێز نەبووە."
