به‌فر و باران كۆتایی پێدێت

كه‌شناسی كه‌شی پێشبینیكراوی 48 كاتژمێری داهاتووی بڵاوكرده‌وه‌ و ئاشكرای ده‌كات، كه‌ سبه‌ی هه‌ینی كۆتایی به‌ شه‌پۆلی به‌فر و باران بارین دێت.

ئه‌مڕۆ پێنجشه‌ممه‌ كه‌شناسی هه‌رێمی كوردستان بڵاویكرده‌وه‌، كه‌شی ئه‌مڕۆ ئاسمان هەوری تەواو دەبێت، نمە باران و بارانی مامناوەند لە زۆربەی ناوچەکان دەبارێت، لە ناوچە شاخاوییەکان و ئەو ناوچانەی نزیکن لە ناوچە شاخاوییەکان بەفر بارینی دەبێت وه‌ك ناوچە سنوورییه‌كان، مێرگەسوور، ئامێدی، سنووری ئیدارەی سۆران، بەشێک لە ئیدارەی ڕاپەرین و چیای سەفین لە پارێزگای هەولێر، هاوكات پێشبینی بارینی بەفر و کڕێوه‌ لە سەنتەری پارێزگای دهۆک و دەورووبەری و ئیدارەی زاخۆ لە کاتەکانی شەودا ڕێژەی بارینی بەفر و باران و کرێوە زیاتر دەبێت.

سه‌باره‌ت به‌ كه‌شی سبه‌ی هه‌ینی كه‌شناسی نووسیویه‌تی، سبه‌ی ئاسمان هەوری تەواو دەبێت، لە کاتەکانی بەیانیدا کاریگەری شەپۆلی باران بارین و بەفر بارین لەسەر ناوچەکەمان بەردەوامی دەبێت بە تایبەت لە ناوچە سنوورییەکان و ناوچە شاخاوییەکان، لە کاتەکانی شەودا کاریگەری ئەو شەپۆلە لاواز دەبێت و کۆتایی پێ دێت.

جێی باسه‌ كه‌شناسی له‌ بڵاوكراوه‌كه‌ی جه‌خت له‌وه‌ ده‌كاته‌وه‌، پله‌كانی گه‌رما به‌رده‌وام ده‌بن له‌ نزمبوونه‌وه‌ و كه‌شوهه‌وا ساردتر و ناجێگیرتر ده‌بێت.

بەرزترین پلەکانی گەرمای پێشبینیکراو بە پلەی سیلیزی:

هەولێر : 7 پلەی سیلیزی
سلێمانی : 4 پلەی سیلیزی
دهۆک : 5  پلەی سیلیزی
زاخۆ  : 4  پلەی سیلیزی
کەرکوک : 9 پلەی سیلیزی 
هەڵەبجە : 6 پلەی سیلیزی
گەرمیان : 8 پلەی سیلیزی