دەم پارتی: هیوادارین تورکیا پەیامەکانی کۆڕبەندی مێپس بە گرنگ وەربگرێت
ئایشەگوڵ دۆغان گوتەبێژی دەم پارتی بە گرنگییەوە باسی کۆڕبەندی مێپس دەکات
ئایشەگوڵ دۆغان گوتەبێژی دەم پارتی بە گرنگییەوە باسی کۆڕبەندی مێپس دەکات و داوا لە دەسەڵاتدارانی تورکیا دەکات پەیامەکانی کۆڕبەندەکە بە هەند وەربگرن.
کۆڕبەندی مێپس بۆ ئاشتی و ئاسایشی ڕۆژهەڵاتی ناوەڕاست بە بەشداریی دەیان کەسایەتیی گرنگی کوردستان و عێراق، ڕۆژئاوا و باکووری کوردستان و تورکیا بەڕێوەچوو و تێیدا دۆخی هەنووکەیی ناوچەکە ورووژێنرا، هاوکات چەندین پەیامیشی بۆ وڵاتان و لایەنەکانی ناوچەکە تێدا باس کرا.
ئایشەگوڵ دۆغان، گوتەبێژی دەم پارتی لەبارەی کۆمەڵێک پەیامی کۆڕبەندەکەوە ڕایگەیاند، ئەو کۆڕبەندەی لە دهۆک بەڕێوەچوو چەندان پەیامی گرنگ و بە بایەخی لەخۆ گرتبوو، ئێمە وەکو ناوەندی بەڕێوەبەریی دەم پارتی کۆڕبەندەکەمان تاوتوێ کرد و زۆربەی پەیامەکانی پەیوەست بوون بە دۆخی ئێستای تورکیاوە.
ئایشەگوڵ دۆغان گوتیشی، پەیامەکان ئەوکاتە گرنگییان زیاتر بوو کە سەرۆک بارزانی، سەرۆکی حکومەتی هەرێم، سەرۆکی هەرێم، مەزڵووم عەبدی، ئیلهام ئەحمەد و عوسمان بایدەمیر و دەیان کەس و کەسایەتیی دیاری ناوچەکە تێیدا بەشدارییان کرد، بۆیە ئەم پەیامانە بایەخی زۆریان هەیە و هیوادارین لایەنە پەیوەندیدارەکانی تورکیا بە گرنگییەوە لەم پەیامانە بڕوانن.
شەشەمین کۆڕبەندی ئاشتی و ئاسایشی ڕۆژهەڵاتی ناوەڕاست لە زانکۆی ئەمریکیی دهۆک بەڕێوەچوو و تێیدا کەسایەتییە دیارەکان تیشکیان خستە سەر دۆخی هەنووکەیی و سەقامگیریی زیاتر لە ناوچەکە، بەتایبەت کە لە ئێستادا و لە تورکیا پڕۆسەی ئاشتی هاتووەتە ئاراوە، گوتەبێژی دەم پارتی پێی وایە، 'پەیامەکانی کۆڕبەندەکە جێگای تێڕامانی تورکیا و دەسەڵاتدارانی ئەو وڵاتەیە و پێویستە گرنگیی پێ بدەن'.
