سەرەڕای بەدەستهێنانی 19 هەزار دەنگ ئەنجامی هەڵبژاردن بە دڵی ئێمە نەبوو

شاهۆ نەجم کەرکووکی، کاندیدی ژمارەی دووی لیستی 275ـی پارتی دیموکراتی کوردستان، پەیامی خۆی لەسەر ئەنجامی هەڵبژاردنەکان بڵاوکردەوە و ئاماژە بەوە دەکات، “سەرەڕای بەدەستهێنانی 19 هەزار دەنگ، ئەنجامی هەڵبژاردن بە دڵی ئێمە نەبوو و هۆکارەکەشی هەڤاڵانی پارتی دیموکراتی کوردستان دەیزانن.”

شاهۆ نەجم کەرکووکی، سەرەڕای بەدەستهێنانی یەک ملیۆن دەنگ لەلایەن پارتی دیموکراتی کوردستان، دڵگرانی خۆی لە کەمبوونەوەی کورسییەکانی کورد و پارتی لە کەرکووک ئاشکرا دەکات و دەڵێت: “دۆخی کەرکووک پێویستی بە کەسێکە کوردانە لە مەیدان بێت بۆ ئەوەی پارێزگاری لە ئاڵا و ناسنامەی و زمان و خاکی کەرکووک بکات و ئەمەش بە خەڵکی ڕەسەنی شارەکە دەکرێت.”

دەقی پەیامی شاهۆ نەجم کەرکووکی:

بەناوی خوای گەورە و میهرەبان

پەیامی سوپاسگوزاری بۆ خەڵکی کەرکووکی دڵی کوردستان و هەموو هەڤاڵانی پارتیمان لە کەرکووک.

هەرچەندە پێکەوە بە گڕوتین و وزەیەکی زۆرەوە، خۆمان ئامادەکرد بۆ هەڵبژاردن و بەهێز و ورەیەکی بەرزەوە، کارمانکرد بۆ سەرخستن و پشتیوانی لە لیستی275ـی پارتی دیموکراتی کوردستان، کە بەندە وەک کوڕە پێشمەرگەیەک کاندیدی ژمارە 2 بووم، بەڵام بەداخەوە ئەنجامی ڕاگەیەندراو دڵخوازی ئێمە و ئێوە نەبوو، سەرەڕای بەدەستهێنانی نزیکەی 19 هەزار دەنگی ڕاگەیەندراو، ئەمەش هۆکارەکانی ڕوونە و هەموو هەڤاڵانی پارتیمان لە کەرکووک ڕاستییەکان دەزانن.

بە شانازی و سەربەرزییەوە ئەمڕۆ لێرەوە دەمەوێت، سوپاسی خانەوادەی سەربەرزی شەهیدان و هێزە قارەمانەکانی پێشمەرگە و ئاساییش و هێزەکانی ناوخۆ و هەموو کەرکووکییەکان بکەم كە متمانەیان بە ئێمە بەخشی. هەرچەندە دڵخۆش بووین، کە پارتیمان توانی ڕیکۆردی بەدەستهێنانی زیاتر لە یەک ملیۆن دەنگ بەدەست بهێنێت، بەڵام دڵگرانیشین بەهۆی کەمبوونەوەی کورسییەکانی کورد و پارتی لە کەرکووک.
 
هۆکاری کەمبوونەوەی کورسی کورد لە کەرکووک، بەهۆی ناڕێکخراوی و دروستکردنی ئاستەنگ بوو لە گەڕانەوەی کەرکووکییەکانی دانیشتووی هەولێر و بنەسڵاوە و دارتوو و ناوچەکانی دیکە، هەروەها نەکردنە بنەمای ئاماری ساڵی 1957 کە ڕێژەیەکی زۆر لە عەرەبی هاوردە مافی دەنگدانیان پێدراوە لەسەر بازنەی کەرکووک.

ئێمە لە ڕوانگەی باوەڕیمان بە پڕۆسەی دیموکراسی و هەڵبژاردن و ڕکابەری لەسەر بنەمای ئەخلاقی بەرزی حزبی و کوردەواری و کەرکووکییانە، خۆمان کاندید کرد و هەمووان شایەتی ئەوە دەدەن، چۆن خزمەتی خەڵکی خۆمان کرد و مێژوومان تۆمارکرد و ڕیکۆردێکی نوێمان لە ژمارەی دەنگەکانی پارتی لە کەرکووک بەدەستهێنا و ئەمەش سەربەرزییەکە بۆ هەموو هەڤاڵانی پارتیمان.

کەرکووکییەکان بەتایبەتیش، ئەو دەنگدەرانەی متمانەیان بە پارتیمان بەخشیوە، دەزانن کە شارەکەیان پێویستی بە نوێنەرێکی ڕاستەقینە هەیە بەرگری لە مافەکانیان بکات و ڕاستگۆ بێت لەگەڵیان، دۆخی کەرکووک پێویستی بە کەسێکە کوردانە لە مەیدان بێت بۆ ئەوەی پارێزگاری لە ئاڵا و ناسنامە و زمان و خاکەکەی بکات. ئەمەش تەنها بە خەڵکی ڕەسەنی شارەکە دەکرێت و لە خەم و ئازاری خەڵکەکەی تێ بگات و لەگەڵیان ژیا بێت، نەک بە درۆ و موزایەدە مامەڵە بکات و تەنها لەکاتی هەڵبژاردندا، ئەوانی بیربێتەوە و دەرگایان بۆ بکاتەوە.

 بەڵێ بە دڵنیاییەوە ئێمە دەزانین خۆشەویستی و دڵسۆزی خەڵکی خۆمان زۆر لەوە زیاتر و گەورەترە. بۆیە پەیامی من بۆ هەمووان ئەوەیە: لەناخی دڵمەوە زۆر سوپاستان دەکەم، ئێوە منتان قەرزاربار کرد و وەفاتان بۆ بنەماڵەی فەرماندەی پێشمەرگە نەجم کەرکووکی دووپات کردەوە.

بەڵێنیش دەدەم، هەروەک چۆن پێشتر پێکەوە بووین، هەر بەوشێوەیە لە خۆشی و ناخۆشیدا پێکەوە دەبین و دەرگاشمان هەمیشە کراوە دەبێت بە ڕووی هەموو کەرکووکییەک و هەموو هەڤاڵێکی پارتی، ئێمە لە خزمەتکردن ناوەستین و بەردەوام دەبین لەپێناو کەرکووک، چونکە تاکە ئامانجی من خزمەتکردن بوو نەک هیچ پلە و پۆستێک.

جارێکی دیکە سوپاس بۆ هەموو کەرکووکییەکان و هەڤاڵانی پارتیمان، داواشتان لێ دەکەم هێمن بن و دان بەخۆتاندا بگرن، دڵنیابن ڕۆژێک دێت ئەو کەسەی دەتانەوێت خزمەتتان بکات، دەبێتە نوێنەری ڕاستەقینەی ئێوە و هەموو کەرکووکییەکان.

براتان 
شاهۆ نەجم کەرکووکی