شەپۆلێکی بارانبارین هەرێمی کوردستان دەگرێتەوە
بەڕێوەبەرایەتییەکانی کەشناسی و شارەزایانی کەشناسی پێشبینی هاتنی شەپۆلێکی بارانبارین بۆ هەرێمی کوردستان دەکات
دووبارە بەڕێوەبەرایەتییەکانی کەشناسی و شارەزایانی کەشناسی، مژدەی هاتنی شەپۆلێکی بارانبارین ئاشکرا دەکەن و چاوەڕوان دەکرێت، لە کۆتایی ئەم هەفتەیە دەستپێبکات.
کەشناسی عێراق لە بڵاوکراوەیەکیدا ڕایگەیاند، لە کۆتایی ئەم هەفتەیە و بە دیاریکراوی رۆژی هەینی، شەپۆلێکی بارانبارین سەرتاسەری هەرێمی کوردستان و عێراق دەگرێتەوە و چاوەڕوان دەکرێت تاوەکو رۆژی سێ شەممە بەردەوام بێت.
لە لایەکی دیکەوە، بەڕێوەبەرایەتی گشتیی کەشناسی و بوومەلەرزەی هەرێمی کوردستان، پێشبینییەکانی بۆ دوو رۆژی داهاتوو ئاشکرا کردووە و ئاماژە بەوە دەکات، رۆژی پێنج شەممە پلەکانی گەرما دوو پلە نزم دەبنەوە.
لە سەرەتای وەرزی پایزەوە تاوەکو ئێستا، شارەزایان و بەڕێوەبەرایەتییەکانی کەشناسی، چەندین جار مژدەی هاتنی شەپۆلی بارانبارینیان ڕاگەیاندووە، بەڵام تاوەکو ئێستا هیچ شەپۆلێکی بارانبارین، نەگەیشتووەتە سەنتەری شارەکانی هەرێمی کوردستان.
