دەنگەکانی پارتی لە یەک ملیۆن تێپەڕی و زیاتریش دەبن

مەسرور بارزانی، سەرۆکوەزیرانی حکومەتی هەرێمی کوردستان لەبارەی سەرکەوتنی پارتییەوە پەیامێکی بڵاوکردەوە. 

سەرۆکوەزیران مەسرور بارزانی لەو پەیامەدا ڕایگەیاندووە، سوپاس بۆ خودای گەورە و بە هەڵوێست و ویستی هاووڵاتییانی بە ئەمەکی کوردستان و ئەندامانی پارتی، دەنگەکانی پارتی دیموکراتی کوردستان لە یەک ملیون دەنگ تێپەری و لە ئەنجامی کۆتایی زیاتریش دەبن.

هاوکات سەرۆکوەزیرانی هەرێم ئەوەشی ڕاگەیاندووە، پیرۆزبایی لە سەرۆک وڕابەری گەلەکەمان جەنابی سەروک بارزانی دەکەم، پیرۆزبایی لە برای بەڕێز و خۆشەویستم کاک نێچیرڤان دەکەم کە تەحەدای یەک ملیونی ڕاگەیاند، سوپاس و دەستخۆشی لە هەموو سەرکردایەتی و ئەندام و لایەنگرانی پارتی دەکەم، پیرۆزبایی لە هەموو خەڵکی کوردستان دەکەم.

لەکۆتاییشدا ئاماژەی بەوەکردووە، ئەم سەرکەوتنە گەورەیە لە پرۆسەی دیموکراسی و هەمو خەڵکی عێراق پیرۆز بێت، بە گوڕ و تینێکی زیاتر لە خزمەتی هەموو کوردستانیان و نیشتمانمان بەردەوام دەبین.
بەرەو وڵاتێکی سەقامگیرتر و ئاوەدانتر.