تا ئێستاش کاندیدان پۆستەر و لافیتە چاپ دەکەن

ماوەی 3 هەفتەیە بانگەشەی هەڵبژاردن بۆ ئەنجوومەنی نوێنەرانی عێراق دەستیپێکردووە، کاندید و لایەنە بەشدارەکان تا ئێستاش بەردەوامن لە چاپکردنی پۆستەر و لافیتەکانیان

ئەمڕۆ چوارشەممە عومەر زۆرباش، سەرۆکی کۆمەڵەی چاپخانەکانی کوردستان بە پایتەخت میدیای ڕاگەیاند، لە سەرەتای دەستپێکی بانگەشەی هەڵبژاردن تا ئێستاش کاندیدەکان بەردەوامن لە چاپکردنی پۆستەر و لافیتەکانیان، بەهۆی ئەوەی پۆستەر و لافیتە لە هەندێک شوێن دانەندراوە یاخود پۆستەرکان شێوێندراون.

سەرۆکی کۆمەڵەی چاپخانەکانی کوردستان ڕاشیگەیاند، هەر کاندیدە و هەر بەگوێرەی توانا داراییەکەی چاپ دەکات و چاوەڕوان دەکرێت تا کۆتایی بانگەشەی هەڵبژاردن چاپکردنی پۆستەر و لافیتەکان بەردەوام بێت.

بەگووتەی عومەر زۆرباش، لە هەولێر زۆرترین پۆستەر چاپ دەکرێت و 6 هەزار و 464 شوێنی چاپ لە سەرتاسەری هەرێمی کوردستان هەن.