کێشەی کەمئاوی زیاتر لە ملیۆنێک کەس چارەسەر دەکرێت

وادەی تەواوکردنی قۆناغی دووەمی پڕۆژەی فریاگوزاری ئاوی خێرای هەولێر ئاشکرا دەکرێت و کێشەی زیاتر لە ملیۆنێک هاووڵاتیی چارەسەر دەبێت.

ئەمڕۆ چوارشممە ئاری ئەحمەد، بەڕێوەبەری ئاو و ئاوەڕۆی هەرێمی کوردستان بە پایتەخت میدیای ڕاگەیاند، بە تەواوکردنی پڕۆژەی فریاگوزاری ئاوی خێرای هەولێر کێشەی کەمئاوی زیاتر لە ملیۆنێک و 4000 کەس چارەسەر دەکرێت و زیاتر لە 80 گەڕەکی هەولێر بەشێوەی ڕاستەوخۆ و ناڕاستەوخۆ سوودمەند دەبن.

بەگووتەی ئاری ئەحمەد، جگە لە سەنتەری شاری هەولێر، دارەتوو، بنەسڵاوە، کەسنەزان، شیاوێز، پیرزین، بەحرکە، عەنکاوە، گەزنە و زیاتر لە 20 گووند سوود لە پڕۆژەی فریاگوزای ئاوی خێرای هەولێر وەردەگرن.

بەڕێوەبەری ئاو و ئاوەڕۆی هەرێمی کوردستان وادەی تەواوکردنی پڕۆژەکە ئاشکرا دەکات، قۆناغی دووەمی پڕۆژەی فریاگوزاری ئاوی خێرای هەولێر سەرەتای مانگی 11 کۆتایی دێت و سەرەتای مانگی 12 پڕۆژەکە دەخرێتە خزمەتی هاووڵاتییان.

لە کۆتایی قسەکانیدا باس لەوەش دەکات، لە قۆناغی یەکەمی پڕۆژەکە نزیکەی 260 بیر داخراون و بە کۆتایی پرۆژەکە ئامانجیانە 1000 بیر دابخەن.