ڕاگرتنی گەشتەکانی فڕۆکەخانەی سلێمانی لەلایەن تورکیاوە درێژکرایەوە

تورکیا ماوەی ڕاگرتنی گه‌شته‌ ئاسمانییه‌کانی فڕۆکەخانەی نێودەوڵەتی سلێمانیی تاوەکو 6ـی کانونی دووەمی 2026 درێژکردەوە.

ئەمڕۆ دووشەممە، بەشی پەیوەندییەگشتییەکان و ڕاگەیاندنی فڕۆکەخانەی سلێمانی بڵاویکردەوە، لە ئاگاداری نامەیەکدا ده‌سه‌ڵاتی فڕۆکه‌وانی شارستانی تورکیا بڕیاری ماوەی ڕاگرتنی گەشتە ئاسمانییەکان و ئاسمانی وڵاتەکەی بەڕووی گەشتەکانی فڕۆکەخانەی نێودەوڵەتی سلێمانی تا 6-1-2026 درێژکردۆتەوە.

فڕۆکەخانەی نێودەوڵەتیی سلێمانی چەندین ساڵە لەلایەن تورکیاوە سزای لەسەرە و هەر ئەمەش بووەتە هۆی ئەوەی زەرەر و زیانێکی زۆر بەر هێڵی ئاسمانیی فڕۆکەوانییەکەی بکەوێت، سەرەڕای هەوڵەکانیش بۆ ئاسایی کردنەوە و دەستپێکردنەوەی گەشتەکانی ئەو فڕۆکەخانەیە بەرەو تورکیا، بەڵام حکومەتی تورکیا ڕازی نەبووە و سزای زیاتری خستووەتە سەر فڕۆکەخانەی نێودەوڵەتیی سلێمانی.