بڵاوكردنەوەی وێنە و ڤیدیۆی تاوان و ڕووماڵكردنی قەدەغە کرا
حکومەتی هەرێمی کوردستان بڵاوکردنەوەی وێنە و ڤیدیۆی تاوان و پەخشی رادستەوخۆ قەدەغە دەکات
بەهۆی کاریگەری خراپی ڕووماڵی هەواڵی تاوان بەسەر دەروونی خەڵکەوە، حکومەتی هەرێم گشت کەناڵ و میدیاکان لە بارەی ڕووماڵکردنی ئەم جۆرە هەواڵانە ئاگادار دەکاتەوە.
ئەمڕۆ دووشەممە، فەرمانگەی میدیا و زانیاری ڕایگەیاند، لە گشتاندنێكی وەزارەتی ڕۆشنبیریی حكومەتی هەرێمی كوردستاندا كە بۆ گشت میدیا بینراو و بیستراوەكان نێردراوە، بڵاوكردنەوەی ڤیدیۆ و وێنەی تاوان و تۆمەتباران و ڕووماڵكردنی ڕاستەوخۆی تاوانەكان قەدەغە كراوە.
لە نووسراوەكەدا هاتووە، پیشاندانی تۆمەتبار و شوێن و كاتی ئەنجامدانی شەڕ و تاوانەكان، لە ڕووی یاساییەوە كاریگەریی گەورەی لەسە ڕێڕەوی لێكۆڵینەوە دەبێت، لە هەمان كاتدا كاریگەریی لەسەر لایەنی كۆمەڵایەتی و دەروونیی خەڵك هەیە، ئەوەش كێشەی خێزانی و ناوچەیی و نەتەوەیی دروست دەكات، چونكە خەڵكانێك ئەو بابەتانە بۆ بەكارهێنانی سیاسی و هاندان و دووبەرەكی و ئاژاوە دەقۆزنەوە.
داوا لە گشت میدیا بینراو و بیستراوەكان و ڕایەڵەكانیان دەكەن، بە هیچ شێوەیەك وێنە و ڤیدیۆی هیچ ڕووداوێكی تاوان و شەڕێك بڵاو نەكەنەوە، هەروەها ڕووماڵی ڕاستەوخۆی شوێنی ڕووداو قەدەغەیە.
