لەبارەی بەرزترین ڕێژەی جیابوونەوەی هاوسەران ڕوونکردنەوە دەدرێت

دوابەدوای بڵاوبوونەوەی ئاماری بەرزترین ڕێژەی هاوسەران دادگەی باری کەسی کۆیە ڕوونکردنەوە دەدات و دەڵێت: "ئامارەکە دوورە لە راستییەوە".

ئەمڕۆ پێنجشەممە دادگەیی باری کەسی کۆیە لە نووسراوێکدا ڕایگەیاند، ماوەی چەند ڕۆژێکە لە زۆرێک لە ئەکاونت و پەیجەکان بەناوی چەند پارێزەرێک ئاماری جیابوونەوەی هاوسەران بڵاوکراوەتەوە کە گوایە لەسەرەتای ئەمساڵەوە تاوەکوو 1-9- 2025، 400 حاڵەتی جیابوونەوە لەدادگەی باری کەسیی کۆیە تۆمار کراوە.

دادگەکە هەواڵەکە ساغ دەکاتەوە و گووتی: "تەواوی ئەم هەواڵانە دوورن لە ڕاستی، هەروەها بڵاوکردنەوەی ئەم هەواڵانە بەبێ ئاگاداری ئاماری فەرمی ئەم دادگەیە بووە".

ئامارە فەرمییەکە ئاشکرا دەکات، لە سەرەتای ئەمساڵ تاوەکوو 1-9-2025، 151 داوای جیابوونەوەی هاوسەران تۆمار کراوە.

لە نووسراوەکەدا هاتووە، دادگە بە مافی خۆی دەزانێت بەدواداچوون بۆ ئەم هەواڵانە بکات و ڕێکاریی یاسایی بەرانبەر ئەو کەس و پەیجانە بگرێتە بەر کە باری دەروونی خەڵک تێکد دەدەن.