دەست بە خەرجکردنی پارەی دەرمان بۆ نەخۆشخانەکانی سلێمانی کرا
کێشەی کەمی دەرمان لە سلێمانی چارەسەر کرا و دەستکرا بە خەرجکردنی پارەی دەرمان بۆ نەخۆشخانەکانی سلێمانی
تاوەکو کۆتایی ئەم ساڵ کێشەی نەشتەرگەری و دەرمان چارەسەرکراوە و ئەمڕۆ دەست بە خەرجکردنی پارەش کراوە.
ئەمڕۆ چوارشەممە، بەڕێوەبەرایەتیی گشتیی تەندروستیی سلێمانی ڕایگەیاند، دوای ئەوەی لەسەر ڕاسپاردەی لایەنە پەیوەندیدارەکان لە حکومەتی هەرێمی کوردستان، بڕیاری چارەسەرکردنی کێشەی نەشتەرگەری، دەرمان و نەبوونی کەرەستەی پزیشکی لە سلێمانی درا, هەر ئەمڕۆ دەستکرا بە خەرجکردنی پارەکە.
لە درێژەی ڕاگەیەندراوەکدا هاتووە، ئیتر بەم بڕیارە، کێشەی نەشتەرگەری و دەرمان و نەبوونی کەرەستەی پێویستی پزیشکی لە سلێمانی، تا کۆتایی ئەمساڵ کۆتایی هات و چارەسەر کرا.
جێی باسە کێشەی کەمیی دەرمان و کەرەستەی پزیشکی و کێشەی نەشتەرگەری لە نەخۆشخانەکانی سلێمانی، بوبووە هۆی ئەوەی چەندین نەخۆشخانەی سەرەکی وەک نەخۆشخانەی هیوا (تایبەت بە نەخۆشییەکانی شێرپەنجە)، منداڵبوون، د. جەمال ئەحمەد ڕەشیدی منداڵان، پسپۆڕییەکانی دڵ و بانکی خوێن ڕووبەڕووی کەمیی تووند لە پێداویستییە پزیشکییەکان ببنەوە.
