کورسی خوێندنی خۆڕایی ڕاگەیاندرا

زانکۆی پۆلیتەکنیکی هەولێر کورسی خوێندن لە بەشی میدیا بۆ ڕۆژنامەنووسان تەرخان دەکات و مەرجەکانی وەرگرتن ئاشکرا دەکات.

ئەمڕۆ دووشەممە زانکۆی پۆلیتەکنیکی هەولێر ڕاگەیەندراوێکی بڵاوکردەوە، پاڵپشت بە ڕێنماییەکانی وەزارەتی خوێندنی باڵا و توێژینەوەی زانسی، 6 کورسی خوێندن بۆ ڕۆژنامەنووسان لە بەشی میدیا لە کۆلیژی تەکنیکی کارگێڕی تەرخان دەکات.

دووپاتیکردەوە، پڕۆسەی پێشکەشکردن بەشێوەی ڕاستەوخۆ دەبێت و لەڕۆژی سێشەممە ڕێکەوتی 10ـی 9ــی 2025، فۆرم لە تۆماری کۆلیژ دابەش دەکرێت.

ئەوەشی خستەڕوو، ڕۆژی دووشەممە ڕێکەوتی 15ـی 9ـی 2025، کاتژمێر 9:30 بەیانی تاقیکردنەوەی توانستی گشتی لە بەشی میدیا لە کۆلێژی تەکنیکی کارگێری ئەنجام دەدرێت.
زانکۆی پۆلیتەکنیکی هەولێر مەرجەکانی وەرگرتن دەخاتەڕوو: 

- دەرچووی ئامادەیی وێژەیی یان زانستی یان بەشی راگەیاندنی پەیمانگە بێت.

- کۆنمرەی لە 60 کەمتر نەبێت.

- ماوەی کاری لە میدیا لە سێ ساڵ کەمتر نەبێت و لە ئێستادا بەردەوام بێت لە کارکردن.

- پشتگیری سەندیکای ڕۆژنامەنووسانی کوردستان یان ئەو دامەزراوەی کاری تێدا دەکات پێشکەش بکات.

- مەرجی وەرگرتن بریتییە لە دەرچوون لە تاقیکردنەوەی توانستی گشتی لەبارەی میدیاوە کە 40 نمرەی لەسەرە.