وەزیری ناوخۆی عێراق شەڕێکی کراوە ڕادەگەیەنێت
شەڕێکی کراوە بەڕێوەیە
دوای ئەوەی شەوی رابردوو ژمارەیەک ئەفسەر و پۆلیس لەلایەن چەكدارانی عەشایەرییەوە كوژران، وەزیری ناوخۆی عێراق شەڕێکی کراوە ڕادەگەیەنێت.
ئەمڕۆ یەکشەممە عەبدولئەمیر شەمەری، وەزیری ناوخۆی عێراق ، ڕایگەیاند، تیرۆر و مادەی هۆشبەر و ململانێی عەشایەری، هەڕەشە لە ئاشتەوایی كۆمەڵایەتی دەكەن، هیچ یەكێك لەوان مەترسییان لەویتر كەمتر نییە.
جەختی لەوەشکردەوە، جارێكی دیكە شەڕ لە دژی ئەو كێشانە رادەگەیەنین، شەڕێكی كراوە، سازش و نەرمی نواندنی تێدا نەبێت.
وەزیری ناوخۆی عێراق دووپاتیکردەوە، ئەوەی چەك بە رووی دەوڵەت بەرز دەكاتەوە و هێرش دەكاتە سەر پیاوانی دەوڵەت، ئەوا بە دەستێكی پۆڵاین لێی دەدەین.
شەوی رابردوو هێزێكی ئەمنی لە هەوڵی كۆنترۆڵی شەڕێكی عەشایەرییدابوون، لە ناوچەی مەعاملی رۆژهەڵاتی بەغدا، بەم هۆیەوە لەلایەن چەکدارەکانەوە 4 كەس كوژران كە دووانیان ئەفسەر بوون و نۆ پۆلیسیش بریندار بوون.
