ئەگەر ناوت بۆ وەرگرتنی زەوی دەرنەچووە ئاگادار دەکرێیتەوە
مامۆستا و فەرمانبەرانی سلێمانی لە بارەی دابەشکردنی زەوی ئاگادار دەکرێنەوە
بەڕێوەبەرایەتی پەروەردەی سلێمانیی ئاگاداری ئەو مامۆستا و فەرمانبەرانە دەكاتەوە، كە ناویان بۆ وەرگرتنی زەوی دەرنەچووەو و دەیانەوێت پەڵپ بگرن.
ئەمڕۆ دووشەممە، لیژنەی فۆڕمی زەوی فەرمانبەرانی سەر بە بەڕێوەبەرایەتی پەروەردەی سلێمانیی لەنووسراوێكدا بڵاویکردەوە، ئاگاداری سەرجەم بەشەكانی دیوانەکە دەکەینەوە، کە هەر مامۆستا و فەرمانبەرێك دەیەوێت پەڵپ بگرێت لە دەرنەچوونی ناوەكەی لە تیروپشكی ئەلیكترۆنی سەرۆكایەتی شارەوانی سلێمانی، پێویستە داواكارییەكی فەرمیی نووسراو بۆ لیژنەكەمان بنووسێت، تاوەکو ئێمەش سەرۆكایەتی شارەوانی سلێمانی لێ ئاگادار بكەینەوە و بەدواداچوونی بۆ بکەن.
لیژنەکە ڕایگەیاندووە، پێویستە هەر کەسێک کە داوای پەڵپ دەکات، ئەم مەرجانەی خوارەوەی هەبێت؛
١- ڕەزامەندی ئەنجومەنی وەزیرانی هەبێت بۆ وەرگرتنی زەوی
٢- كارتی زانیارییەكەی سەنتەری شاری سلێمانی بێت
٣- كۆی خاڵەكانی كەمتر نەبێت لە كەمترین خاڵی دەرچوو لە تیروپشكەكە بە جۆرێك زانیاری كەمترین خاڵی دەرچوو لای ئێمە نییە و لای سەرۆكایەتی شارەوانی سلێمانییە، بۆیە ئەو بەراوردكارییە بۆ سەرۆكایەتی شارەوانی بەجێدەهێڵرێت.
