پارەی گەنمی جووتیارانی هەرێمی کوردستان دابەش دەکرێت

ماوەی سێ مانگە جووتیارانی هەرێمی کوردستان گەنمەکانیان ڕادەستی سایلۆکان کردووە، شاخەوان عەبدوڵڵا موژدەی دابەشکردنی شایستە دارییەکان دەداتە جووتیاران.

ئەمڕۆ شەممە شاخەوان عەبدوڵڵا، جێگری سەرۆکی پەرلەمانی عێراق بڵاویکردەوە، لە دیدارێکدا لەگەڵ ئەسیر داود، وەزیری بازرگانی تاوتوێی شایستەی جووتیارانمان کرد و بەڵێن درا شایستەی سەرجەم جووتیاران بدرێت.

ئەوەشی خستەڕوو، لە هەرێمی کوردستان، کەرکووک، مەخموور و تەواوی ئەو ناوچانەی دواکەوتوون، بۆ گەڕی ئەمجارە کە 500 ملیار دینار تەرخان کرا.

دەربارەی وادەی ڕەوانەکردنی پارەکە گووتی: "لە چەند رۆژی داهاتوودا دەخرێتە سەر هەژماری وەزارەتی بازرگانی، سەرەتا شایستەی ئەو جووتیارانە دەدرێت کە بڕکەی کەمە و ناتوانرێت زیاتر دوابخرێت".

لە کۆتایی قسەکانیدا ئەوەش هاتووە، بڕیار درا ئەوانەی تاوەکو 50 تۆنیان رادەستکردووە، لە گەڕی ئەم جارە هەمووی خەرج بکرێت، دواتر بۆ ئەوانەی لە 50 تۆن زیاتریان رادەست کردووە.