بێ بەرامبەر کابینە دەدرێت بە گەنجان

لە پێناو ڕەخساندنی هەلی کار شارەوانی هەولێر بڕیاریداوە بێ بەرامبەر کابینە بداتە ئەو گەنجانەی بەهرەدارن.

ئەمڕۆ شەممە کارزان هادی، سەرۆکی شارەوانی هەولێر لەبارەی پێدانی کابینە بە گەنجان بە پایتەخت میدیای ڕایگەیاند، لە پێناو ڕەخساندنی هەلی کار بۆ گەنجانی کوڕ و کچی شار، هەڵدەستین بە ئەنجامدانی فیستیڤاڵێکی 15 رۆژە بۆ بەهرەمەندانی کاری دەستی و کەل و پەلی نەخش و نیگار و خواردنی کوردەواری.

شوێنی فیستیڤاڵەکە ئاشکرا دەکات، لە ناو پارکی سامی عەبدولڕەحمان بە شێوەی بێ بەرامبەر کابینە دەدرێت بە گەنجان و تەنیا ڕسوماتێکی کەمی گواستنەوە وەردەگیرێت.

هەر لەمبارەیەوە سەرۆکایەتی شارەوانی هەولێر بڵاویکردەوە،  ئاگاداری هاووڵاتییان و ئارەزوومەندانی فستیڤاڵ دەکەینەوە دەتوانن سەردانی سەرۆکایەتی شارەوانی هەولێر بەشی پلاندانان بکەن.

وادەی سەردانیکردنەکە بۆ شارەوانی ڕووندەکاتەوە، لە ڕۆژی یەکشەممە ڕێکەوتی 31ـی 8ـی 2025، تاوەکو ڕۆژی سێشەممە 2ـی 9ـی 2025، بەمەبەستی وەرگرتنی ڕەزامەندی بۆ کارکردن لە یەکێک لە کابینەکانی ناو پارک لە کاتی بەڕێوەچوونی فیستیڤاڵەکە.