هەڵەبجە سوپاسی حکومەت دەکات بۆ دابینکردنی کارەبای 24 کاتژمێریی
پارێزگای هەڵەبجە داوایەک ئاڕاستەی ئەنجوومەنی وەزیران دەکات
دوای ئەوەی ڕۆژی پێنجشەممە حکومەتی هەرێمی کوردستان وەک یەکەمین پارێزگا لەسەر ئاستی تەواوی عێراق گەیشتنی کارەبای 24 کاتژمێریی لە هەڵەبجە ڕاگەیاند و پارێزگاکە سوپاسی خۆی دووپاتدەکاتەوە و داواکارییەک ئاڕاستەی ئەنجوومەنی وەزیران دەکات.
ئەمڕۆ شەممە پارێزگای هەڵەبجە بڵاویکردەوە، پاش ئەوەی پڕۆژەی ”ڕووناكی” دابینکردنی کارەبای ٢٤ کاتژمێری گەیشتە پارێزگای هەڵەبجە، بەمەش بووە یەکەمین پارێزگا لەسەر ئاستی عێراق و هەرێمی کوردستان کە بە تەواوەتی لەم پڕۆژەیە سوودمەند دەبێت.
جەختیش لەوەدەکاتەوە، هاووڵاتییان و خاوەنکاران دەبنە خاوەن کارەبای بەردەوام، ئیدارەی پارێزگامان سوپاسی حکومەتی هەرێمی کوردستان دەکات کە هەڵەبجە وەک یەکەمین پارێزگا بە تەواوەتی ڕووناک دەکاتەوە.
باسی لەوەشکرد، ئەمە بە دەستکەوتێکی گرنگ دادەنرێت بۆ پارێزگاکەو هاووڵاتییانمان، ئاگادارتان دەکەینەوە وەکو پارێزگای هەڵەبجە لەسەر داواکارییتان نامەی فەرمیی پێشکەش بە ئەنجومەنی وەزیران کراوە دەربارەی نرخی کارەبا.
دەربارەی داواکاری کەمکردنەوەی نرخی کارەبا ڕوونیکردەوە، بە لەبەرچاوگرتنی ئەوەی کە هەڵەبجە پارێزگایەکی نوێیە و ژمارەی دانیشتووانەکەی کەمە، داوامان کردووە کە جیاکارییەک بۆ پارێزگاکە بکرێت لە نرخی کارەبادا.
لە بڵاوکراوەکەدا هاتووە، کارەبا و نەبوونی وزە کێشەیەکی گەورەیە لە هەموو عێراق و هاووڵاتییان بە دەستییەوە دەناڵێنن، داوا لە هاوڵاتییانی خۆشەویست دەکەین، کە هۆشیارانە مامەڵە لەگەڵ بەکارهێنانی کارەبادا بکەن.
