بۆچی ئەم سەرۆک حزبە لە سلێمانی دەستگیر کرا؟

ئارام قادر ناسراو بە ئەیوب نیعمەت قادر، ئەندامی سەرکردایەتی پێشووی کۆمەڵی دادگەری و سەرۆکی پێشووی هاوپەیمانیی نیشتمانی لەسەر چی گیراوە و بۆچی لە زیندانە؟ پایتەخت میدیا زانیاریی تایبەت لەمبارەیەوە ئاشکرا دەکات. 

مانگی ١٠ـی ساڵی ڕابردوو هەڵبژاردنی پەڕلەمانی کوردستان بەڕێوەچوو، هاوپەیمانیی نیشتمانی بە سەرۆکایەتی ئارام قادر بەشداریی کرد و هیچ کورسییەکیان بەدەست نەهێنا، ئارام قادر دەستی لە پۆستی سەرۆکایەتیی حزبەکەی کێشایەوە، بەڵام ماوەی دوو مانگ دەبێت کە لەلایەن هێزە ئەمنییەکانی سلێمانییەوە پاش بانگکردن دەستگیر کراوە، پێشتر دەنگۆی ئەوە هەبوو کە بەهۆی دۆسییەیەکی هەواڵگرییەوە دەستگیرکراوە، بەڵام پایتەخت میدیا لە سەرچاوەی تایبەتەوە زانیویەتی، کە ئارام قادر بە دیاریکراوی بەهۆی کارکردن بۆ دەزگا هەواڵگرییەکانی تورکیا لە دژی سلێمانی دەستگیرکراوە.

ساڵی ٢٠٢٠ ڕۆژێک محەممەد گرتک، بەرپرسی دەڤەری راپەرینی هاوپەیمانیی نیشتمانی لەلایەن پەکەکەوە بانگهێشت دەکرێت بۆ قەندیل، پەکەکە محەممەد گرتک دەستگیر دەکات و دواتر دانپێدانانی لێوەردەگیرێت، ئەمەش بەهۆی ئەوەی لە بەرامبەر پارەدا وێنە و ڤیدیۆی شوێن و حەشارگەکانی چەکدارانی پەکەکەی بۆ میتی تورکیا ناردبوو، دوای ئەم ڕووداوە پەکەکە دوو ئەندامی خۆی دەنێرێتە ماڵی ئارام قادر لە سلێمانی و ڤیدیۆی دانپێدانانەکەی محەممەد گرتکی پێ پیشان دەدرێت، ئارام قادر دوای ئەوەی دەزانێت چی ڕوویداوە، بۆ کۆنتڕۆڵ کردنی دۆخەکە پەیوەندی بە لاهور شێخ جەنگییەوە دەکات کە ئەوکات هاوسەرۆکی یەکێتی بوو و پەیوەندی لەگەڵ پەکەکەدا باش بوو. 

پەکەکە چەندین جار داوا لە یەکێتی دەکات کە ئارام قادر دەستگیر بکەن، بەڵام یەکێتی گوێ بە داواکارییەکەی پەکەکە نادات، سەرەنجام دوای ماوەیەک ئاشکرا دەبێت، کە ئارام قادر بە دیاریکراوی دەستی هەبووە لە پێدانی زانیاری بە میتی تورکیا و دەزگا هەواڵگرییەکانی دیکەی ئەو وڵاتە، بە تایبەت زانیاری لەسەر جموجۆڵی ئەندامانی پەکەکە و هاتووچۆیان لە فڕۆکەخانەی سلێمانییەوە بە تورکیا داوە، کە هەر ئەمەش هۆکارێکی گەورە بوو بۆ داخستن و ڕاگرتنی گەشتەکانی فڕۆکەخانەی سلێمانی لەگەڵ تورکیا.